შეწყალება არის პრეზიდენტის დისკრეციული უფლება, რომელზედაც ახნსა არ შეიძლება, განმარტება არ შეიძლება, - ამის შესახებ საქართველოს პრეზიდენტმა, სალომე ზურაბიშვილმა საქართველოს პირველი არხის გადაცემისთვის "თავისუფალი ხედვა" მიცემულ ექსკლუზიურ ინტერვიუში განაცხადა.
მისი თქმით, 28 აგვისტოს შეწყალების აქტზე, მთავარი აქცენტი გაკეთებული იყო იმაზე, რატომ არ განმარტავდა რატომ შეიწყალა კონკრეტულად ისინი.
"სწორედ ეს არის მთავარი აუცილებლობა შეწყალების დროს. რამეთუ, შეწყალება არ არის გამოსწორება, სასამართლოს გადაწყვეტილების. როგორც კი პრეზიდენტი დაიწყებდა თავისი არგუმენტების მოტანას, რა გარემოებების გამო მიიღო გადაწყვეტილება, რომელიც საზოგადოების ნაწილისთვის შეიძლება მიუღებელი იყოს, მაშინვე ისმება საკითხი, პრეზიდენტის არგუმენტები უფრო მაღლა დგას ვიდრე სასამართლოსი? და შემდგომ კიდევ უარესი, ჩვენს საზოგადოებაში მით უმეტეს, მსჯელობა იმაზე ეს რატომ, ის რატომ, როგორ იქნებოდა... ყველას ექნებოდა აზრი.
ჩვენ საჯარო სივრცეში შემოგვაქვს საკითხები რომელიც იმ კერძო სივრცეში არანაირად არ შეიძლება. ჩვენ მეორე სასამართლო არ უნდა გავმართოთ. ეს არც ოჯახისთვის არ არის სწორი, არც მსჯავრდებულებისთვის არც დაზარალებული ოჯახებითვის. ასე, რომ აუცილებელია კონფიდენციალურობა იყოს შენარჩუნებული და ბოლოს და ბოლოს ეს არის დისკრეციული უფლება, რომელზედაც ახსნა არ შეიძლება, განმარტება არ შეიძლება", - თქვა პრეზიდენტმა.
