გამომძიებელს, რომელიც 15 წლის მოზარდის თვითმკვლელობის საქმეზეა დაკავებული, ბრალი წარუდგინეს. ბრალის წარდგენა საავადმყოფოში მოხდა, რადგან გამომძიებელი მარიანა ჩოლოიანი დაკავების შემდეგ შეუძლოდ გახდა.
ბრალდების მხარის მტკიცებით, პროკურატურა სასამართლოს ჩოლოიანისთვის პატიმრობის შეფარდების შუამდგომლობით მიმართავს. გარდა ამისა, პროკურორის თქმით, ჩოლოიანი არასრულწლოვნების დაკითხვას კანონდარღვევით აწარმოებდა.
"მარიანა ჩოლოიანმა არ იხელმძღვანელა არასრულწლოვანთა მართლმსაჯულების პრინციპებით და გამოკითხვის დროს აიძულა ჩვენების მიცემა ლუკა სირაძეს. ლუკა სირაძემ არ აღიარა დანაშაული. ამის შემდეგ გამომძიებელმა გააგრძელა გამოკითხვა ისეთ პირობებში, როდესაც მოწმეების დაპირისპირებას ჰქონდა ადგილი. ამ დროს არასრულწლოვნებმა ფსიქოლოგიური სტრესი განიცადეს. გენერალური პროკურატურა მიმართავს სასამართლოს ბრალდებულის მიმართ პატიმრობის გამოყენებასთან დაკავშირებით. გამოძიების ინტერესებიდან გამომდინარე მეტ კომენტარს ვერ გავაკეთებ", - განაცხადა პროკურორმა.
15 წლის ლუკა სირაძემ თვითმკვლელობა 12 დეკემბერს სცადა. ის მე-9 სართულიდან გადმოხტა. შემთხვევას წინ უძღოდა „მწვანე სკოლაში“ მომხდარ ინციდენტთან დაკავშირებით მოზარდის პოლიციის განყოფილებაში მოწმის სახით დაკითხვა. მოზარდის ჯანმრთელობის მდგომარეობა, ექიმების შეფასებით უკიდურესად მძიმე იყო და 17 დეკემბერს გარდაიცვალა. მოზარდის გარდაცვალების შემდეგ, იმავე დღეს, სახელმწიფო ინსპექტორის აპარატმა დიდუბე-ჩუღურეთის სამმართველოს პოლიციის პირველი განყოფილების გამომძიებელი მარიანა ჩოლოიანი, ჩვენების მიცემის იძულების ბრალდებით დააკავა. დაკავებული გამომძიებელი ბრალდებას არ აღიარებს. მისთვის ჯერ ბრალი ოფიციალურად არ წარუდგენიათ
