როცა მმართველი პარტია არის “ქართული ოცნება” და 7- წლიანი ეპოპეა აქვს დასრულებული და გაბრწყინებულ ქვეყანაში უნდა ვცხოვრობდეთ, დღეს “ნაციონალური მოძრაობისკენ” ხელის გაშვერა, როგორც მინიმუმ უხერხულია, - განაცხადა ტელეკომპანია „პირველის“ ეთერში საია-ს თავმჯდომარემ, სულხან სალაძემ.
სალაძე ხელისუფლებას ურჩევს, რომ ბოტებს თავი დაანებონ და ნუ ცდილობენ 15 წლის მოზარდის საქმეში, სიმძიმის ცენტრი სკოლაზე გადაიტანონ. მისი თქმით, წარმომადგენლები კონკრეტული ჯგუფების გამოყენებით ცდილობენ, რომ თითქოს “ნაციონალური მოძრაობა” უნდა იყოს ამ პროცესში მთავარი.
„როცა მმართველი პარტია არის “ქართული ოცნება” და 7- წლიანი ეპოპეა აქვს დასრულებული და გაბრწყინებულ ქვეყანაში უნდა ვცხოვრობდეთ, დღეს “ნაციონალური მოძრაობისკენ” ხელის გაშვერა, როგორც მინიმუმ უხერხულია. ხელისუფლებას ვურჩევ, რომ მათი კონტროლის ქვეშ მყოფ ბოტებს თავი დაანებონ. მისცენ სახელმწიფო ინსპექტორის სამსახურს საშუალება, რომ მოხდეს ამ საქმის გამოძიება”, – განაცხადა სულხან სალაძემ.
15 წლის ლუკა სირაძემ თვითმკვლელობა 12 დეკემბერს სცადა. ის მე-9 სართულიდან გადმოხტა. შემთხვევას წინ უძღოდა „მწვანე სკოლაში“ მომხდარ ინციდენტთან დაკავშირებით მოზარდის პოლიციის განყოფილებაში მოწმის სახით დაკითხვა. მოზარდის ჯანმრთელობის მდგომარეობა, ექიმების შეფასებით უკიდურესად მძიმე იყო და 17 დეკემბერს გარდაიცვალა. მოზარდის გარდაცვალების შემდეგ, იმავე დღეს, სახელმწიფო ინსპექტორის აპარატმა დიდუბე-ჩუღურეთის სამმართველოს პოლიციის პირველი განყოფილების გამომძიებელი მარიანა ჩოლოიანი, ჩვენების მიცემის იძულების ბრალდებით დააკავა. დაკავებული გამომძიებელი ბრალდებას არ აღიარებს. მისთვის ჯერ ბრალი ოფიციალურად არ წარუდგენიათ.