შვილს აღარ უნდა კუხიანიძე, მამა არ უნდა საკუთარ შვილს, შვილმა და ცოლმა უარყვეს, "ქართულ ოცნებას" ვერ უარვაყოფინეთ, - განაცხადა "თბილისის საკრებულოს "ნაციონალური მოძრაობის" დეპუტატმა, ლევან ხაბეიშვილმა, რომელსაც ერეკლე კუხიანიძის კაბინეტში კარვის დადგმის მცდელობისთვის საკრებულოს შენობა ძალით დაატოვებინეს.
ხაბეიშვილის თქმით, ბრძოლა გაგრძელდება იმისთვის, რომ ერეკლე კუხიანიძემ თბილისის საკრებულო დატოვოს.
"ბრძოლას გავაგრძელებთ. როგორ შეიძლება ასეთი რამ შერჩეს ხელისუფლებას. ვინც ვაპროტესტებთ, ისინი გარეთ უნდა გამოგვაგდონ ძალის გამოყენებით და ვინც ჩვენს მოქალაქეს, რომელიც ტყვეა, წიხლს მიაყოლებს, ის თურმე საკრებულოში უნდა იჯდეს. შვილს აღარ უნდა კუხიანიძე, მამა არ უნდა საკუთარ შვილს, შვილმა და ცოლმა უარყვეს, "ქართულ ოცნებას" ვერ უარვაყოფინეთ. მაინც თანამდებობაზე უნდა იყოს, საკრებულოში უნდა იყოს, ასეთი არაფერი გამიგია. შემდეგი გაჩერება იქნება საკრებულოს თავმჯდომარე, სადაც აუცილებლად დაიდგმება კარავი, როგორც კუხიანიძის კაბინეტში, და დაიდგმება ყველა დეპუტატის ოთახში, ეს ბრძოლა არ გაჩერდება,"- განაცხადა ლევან ხაბეიშვილმა.
საზოგადოების აღშფოთება ერეკლე კუხიანიძის მიერ 14 დეკემბერს გამოქვეყნებულმა პოსტმა გამოიწვია, სადაც ის შეურაცხმყოფელი სიტყვებით მოიხსენიებს ვაჟა გაფრინდაშვილსა და მის ოჯახს და მათ "პროვოკატორებს" უწოდებს.
გარდა ამისა, კიდევ ერთი პოსტი გამოაქვეყნა სოციალურ ქსელში, სადაც საზოგადოებას "ღრმა ფსიქიკური აშლილობის" დიაგნოზი დაუსვა.
