ჩინეთის ხელისუფლების გადაწყვეტილებით, აშშ-ის სამხედრო გემებსა და საჰაერო ძალებს შეუჩერდათ ჰონგ-კონგში ვიზიტების ნებართვა. წერს სააგენტო Reuters-ი ჩინეთს საგარეო საქმეთა სამინისტროს ოფიციალურ წარმომადგენელზე დაყრდნობით.
გარდა ამისა, ჩინეთის ხელისუფლება სანქციებს უწესებს აშშ-ში დაფუძნებულ საერთაშორისო ორგანიზაციებს, მათ შორის Human Rigths Watch-ს, "ჰონგ-კონგში მიმდინარე საპროტესტო აქციების მხარდაჭერისთვის".
ჩინეთის ეს ქმედება პასუხია შეერთებულ შტატებში მიღებული აქტისა, რომლითაც აშშ-ის ხელისუფლებამ მხარდაჭერა გამოუცხადა საპროტესტო აქციების მონაწილეებს.
"მოვუწოდებთ შეერთებულ შტატებს, გამოასწოროს შეცდომები და შეწყვიტოს ჩარევა ჩვენს შიდა საქმეებში. საჭიროების შემთხვევაში, ჩინეთი მიიღებს შემდგომ ნაბიჯებს, რათა დაიცვას ჰონგ-კონგის სტაბილურობა და კეთილდღეობა და ჩინეთის სუვერენიტეტი", - თქვა ჩინეთის საგარეო საქმეთა სამინისტროს პრესსპიკერმა პეკინში გამართულ ბრიფინგზე.
გასულ კვირას, ჩინეთმა დაგმო დონალდ ტრამპის მიერ ხელმოწერილი აქტი "ჰონგ კონგის ადამიანის უფლებებისა და დემოკრატიის შესახებ", რომლითაც ჰონგ-კონგის დემონსტრაციების გამო ჩინეთისთვის სანქციების დაწესება დაანონსა.
ჩინეთს მიერ სანქცირებულთა სიაში მოხვდნენ - NED National Endowment for Democracy, National Democratic Institute for International Affairs, IRI International Republican Institute, Human Rights Watch, Freedom House.