"დღევანდელ შეხვედრას, როგორც მინიმუმ, ის შედეგი მაინც ჰქონდა, რომ ხელისუფლებამ და ოპოზიციამ არგუმენტები გაცვალეს დიპლომატიური კორპუსის და ვენეციის კომისიის თანდასწრებით და დღევანდელმა შეხვედრამ კიდევ ერთხელ დაგვანახა ის, რასაც ვამბობდით, რომ ე.წ."გერმანული მოდელი" არ არის თავსებადი საქართველოს კონსტიტუციასთან",- ამის შესახებ საქართველოს პარლამენტის თავმჯდომარემ ტელეკომპანია "იმედის" პირდაპირ ეთერში განაცხადა.
არჩილ თალაკვაძემ მიმდინარე პოლიტიკურ პროცესებთან დაკავშირებით, მმართველი პარტიის, საპარლამენტო და არასაპარლამენტო ოპოზიციისა და დიპლომატიური კორპუსის წარმომადგენლებს შორის დღეს გამართული შეხვედრა შეაფასა.
პარლამენტის თავმჯდომარემ საერთაშორისო პარტნიორებს და ვენეციის კომისიას აქტიური მადლობა გადაუხადა და ხაზგასმით აღნიშნა, რომ საუბარი ყოველთვის საჭიროა.
მისივე თქმით, ის არ ეთანხმება განცხადებებს იმის შესახებ, რომ შეხვედრა უშედეგოდ დასრულდა ან მისი ჩატარება მნიშვნელობას იყო მოკლებული.
"ეს შეხვედრა იყო მნიშვნელოვანი და თუ ვინმეს აქვს მცდელობა, რომ ამის ნიველირება გააკეთოს და თქვას, რომ ეს შეხვედრა სრულიად უშედეგოდ დასრულდა ან მისი ჩატარება იყო მოკლებული რაიმე მნიშვნელობას, მე ამაში არ დავეთანხმები.
უშედეგოდ დამთავრდა თუ არა, ესეც საკამათოა, იმიტომ, რომ ერთი კონკრეტული შედეგი ამ შეხვედრას ჰქონდა და ეს შედეგი იყო ის, რომ ამ კვირის განმავლობაში ოპოზიციის მიერ ასე ხმამაღლა დაყენებული ინიციატივა ე.წ. "გერმანულ მოდელთან" დაკავშირებით, სადაც იყო სხვადასხვა არგუმენტები წარმოდგენილი, შეიქმნა მოლოდინები და ჩვენს საზოგადოებას მართლა გაუჩნდა კითხვა, არის თუ არა რეალურად ეს მოდელი თავსებადი საქართველოს კონსტიტუციასთან.
ამიტომ, დღევანდელ შეხვედრას, როგორც მინიმუმ, ის შედეგი მაინც ჰქონდა, რომ ხელისუფლებამ და ოპოზიციამ არგუმენტები გაცვალეს, თან ეს გაცვალეს დიპლომატიური კორპუსის და ვენეციის კომისიის თანდასწრებით.
პრაქტიკულად, დღევანდელმა შეხვედრამ ჩვენ კიდევ ერთხელ დაგვანახა ის, რასაც ვამბობდით, რომ ე.წ."გერმანული მოდელი" არ არის თავსებადი საქართველოს კონსტიტუციასთან, საქართველოს კონსტიტუციის დღევანდელ ტექსტთან, ამიტომ, მისი შემოღება არის დაკავშირებული ახალ საკონსტიტუციო ინიციატივასთან, რომელზეც 2020 წლამდე, უკვე, პრაქტიკულად, რესურსი არ არსებობს, რომ ასეთი საკონსტიტუციო ცვლილება კიდევ განხორციელდეს.
ამას სჭირდება კიდევ რამდენიმეთვიანი პროცედურა, საჯარო განხილვები, საბოლოო ჯამში, ჭირდება დეპუტატების ხმების სამი მეოთხედი. ამიტომ, ეს გაირკვა, რომ 77 არ უდრის 150-ს", - განაცხადა პარლამენტის თავმჯდომარემ.
