თაფლის წარმოებაში ევროკავშირის მიერ დაწესებულ სტანდარტებთან შესაბამისობამისობის შესახებ ქართველი მეწარმეების ცნობადობის ამაღლებას ემსახურება „სახელმძღვანელო უვნებელი და ხარისხიანი თაფლის წარმოებისთვის“, რომელშიც თავმოყრილია კონკრეტული მითითებები ხარისხიანი თაფლის წარმოების რთული და კომპლექსური პროცესის ერთიანი ჯაჭვის შესახებ „მინდვრიდან მაგიდამდე“.
14 ნოემბერს საგამოფენო ცენტრ „ექსპო ჯორჯიაში“ „სახელმძღვანელო უვნებელი და ხარისხიანი თაფლის წარმოებისთვის“ პრეზენტაცია გაიმართება. ღონისძიებაში მონაწილეობას მიიღებს 100-მდე მოწვეული სტუმარი, მათ შორის მეფუტკრეობისა და თაფლის წარმოების სექტორში დასაქმებული მეწარმეები.
აღნიშნული პუბლიკაცია მომზადდა საქართველოს გარემოს დაცვისა და სოფლის მეურნეობის სამინისტროს მხარდაჭერით, ევროკავშირის მიერ დაფინანსებული პროექტის „მცირე და საშუალო მეწარმეობა და DCFTA საქართველოში“ ფარგლებში, რომელსაც გერმანიის საერთაშორისო თანამშრომლობის საზოგადოება (GIZ), გერმანიის ეკონომიკური თანამშრომლობისა და განვითარების ფედერალური სამინისტროს სახელით (BMZ) ახორციელებს.
ღონისძიებას გასხნიან საქართველოს გარემოს დაცვისა და სოფლის მეურნეობის მინისტრი ლევან დავითაშვილი, ევროკავშირის ელჩი საქართველოში კარლ ჰარცელი და GIZ-ის „კერძო სექტორისა და პროფესიული განათლება სამხრეთ კავკასიაში“ პროგრამის დირექტორი კატია კამერერი.
ევროკავშირთან ასოცირების ხელშეკრულების ფარგლებში ამოქმედებული ღრმა და ყოვლისმომცველი თავისუფალი სავაჭრო სივრცის შესახებ შეთანხმების (DCFTA) მიხედვით, უკვე თითქმის 3 წელია ქართველ მეწარმეებს საშუალება აქვთ 500 მილოიონიან ევროპულ ბაზარზე თაფლის ექსპორტი განახორციელონ, თუმცა კვლავ მნიშვნელოვანი გამოწვევაა პროდუქციის ხარისხის შესაბამისობა ევროკავშირის მიერ დაწესებულ სტანდარტებთან და თაფლის წარმოების სფეროში კვალიფიციური სპეციალისტების არსებობა. შესაბამისად, აქტიურად უნდა მიმდინარეობდეს მეწარმეთათვის ინფორმაციის მიწოდება ევროკავშირში თაფლის ექსპორთან დაკავშირებული საკითხების შესახებ. სწორედ ამ მიზანს ემსახურება წამყვანი გერმანელი ექსპერტების მიერ შემუშავებული სახელმძღვანელო.
პროექტის, „მცირე და საშუალო მეწარმეობა და DCFTA საქართველოში“ ფარგლებში, ხარისხიანი თაფლის წარმოების ხელშეწყობის მიმართულებით მუშაობა უკვე 3 წელია მიმდინარეობს. სწორედ, ამ პროექტის ფარგლებში შეიქმნა ე.წ. „ქოლგა ბრენდი“ - „TAPLI“, რომლის მიზანიც ქართული პრემიუმ ხარისხის თაფლის ევროპულ ბაზარზე წარდგენაა. აღნიშნული ბრენდის ქვეშ ამ ეტაპზე ის ქართული საწარმოები ერთიანდებიან, რომელთაც პროექტის ფარგლებში ხარისხიანი პროდუქტის წარმოების ყველა მითითება დააკმაყოფილეს. წელს, სწორედ „TAPLI“-ს ბრენდის ქვეშ გაიგზავნა ბერლინის საერთაშორისო გამოფენაზე „მწვანე კვირეული“, ქართული თაფლის პირველი პრემიუმ ხარისხის საექსპორტო პარტია, რომელიც შპს „გეო ნატურალი“-ს (კოოპერატივი „რაჭის ნატურალური პროდუქტები“) და ინდ.მეწარმე თამაზ ღლონტის პროდუქციისგან შედგებოდა.
