ძალადობრივი ჯგუფები ფილმის "და ჩვენ ვიცეკვებთ" ჩვენების წინააღმდეგ გამოსული აქციების გამართვას დღესაც გეგმავენ და გუშინდელი დღის მსგავსად შეკრებას ვერის ბაღში 16:00 საათზე დაიწყებენ, რის შემდეგაც ისინი კინოთეატრებთან გადაინაცვლებენ.
ქართულ-შვედური ფილმის - "და ჩვენ ვიცეკვებთ" ჩვენება საქართველოს კინოთეატრებში გუშინ გაიმართა. ბიზნესმენი ლევან ვასაძე, ფილმის - "და ჩვენ ვიცეკვეთ" კინოთეატრებში ჩვენებას ეწინააღმდეგებოდა და მხარდამჭერებთან ერთად პრემიერის ჩაშლას გეგმავდა ფილმის ჩვენებას ეწინააღმდეგებოდა "მართლმადიდებელ მშობელთა კავშირიც". გურამ ფალავანდიშვილის განცხადებით, ფილმის ჩვენება, ნებისმიერი ძალისხმევის ხარჯზე ჩაიშლებოდა. საპროტესტო აქციაში მონაწილეობდა "ქართული მარშიც".
ძალადობრივი საპროტესტო აქციის მიუხედავად ფილმის ჩვენება კინოთეატრებში მაინც შედგა. კინოთეატრებთან ადგილი ჰქონდა ფიზიკურ დაპირისპირებას და პოლიციასთან შეხლა-შემოხლას. დაკავებულია 27 ადამიანი, მათ შორის 1 სისხლის სამართლის მუხლით.