საქართველოს გენერალური პროკურორი შალვა თადუმაძე ამბობს, რომ იგი ბოდბელი მღვდელმთავრის, მეუფე იაკობის განცხადებებში დანაშაულის ნიშნებს ვერ ხედავს. ამის შესახებ მან ჟურნალისტებს განუცხადა.
"საუბარია მაღალი თანამდებობის პირებზე, რომლებიც იმ დროს არ იყვნენ თანამდებობაზე და მეორე, დანაშაულის შემცველი ნიშნები ამ განცხადებაში არ ყოფილა.
აღნიშნულ განცხადებაში დანაშაულის ნიშნებს ვერ ვხედავ გამომდინარე იქიდან, რომ მასში მოყვანილი ინფორმაციები დროში აცდენელია იმ მოვლენებთან.
რაც შეეხება იმას, თუ არსებობს რაიმე ფაქტები, ყველას მათ შორის სასულიერო პირებს აქვთ უფლება, ჩამოაყალიბონ ერთიანი პოზიცია და მიმართონ საგამოძიებო უწყებას",- თქვა შალვა თადუმაძემ.
ცნობისთვის, ბოდბელმა მთავარეპისკოპოსმა იაკობმა, 26 ოქტომბერს, "ტელეკომპანია პირველის" ეთერში განაცხადა, რომ ჭყონდიდელი მიტროპოლიტი პეტრე ცაავა, დეკანოზი გიორგი მამალაძე, სახელისუფლებო პირები და ვანო ჩხარტიშვილი პატრიარქ ილია II-ის მკვლელობას გეგმავდნენ.
მისივე თქმით, გიორგი კვირიკაშვილის პრემიერობისასა, მას შეხვედრაზე უხმეს, რომელსაც ესწრებოდნენ მაშინდელი ეკონომიკის მინისტრი გიორგი გახარია და მაშინდელი სახელმწიფო უსაფრთხოების სამსახურის ხელმძღვანელი ვახო გომელაური.
მეუფე იაკობი ჰყვება, რომ ისინი მას "ეჩალიჩებოდნენ", რათა პატრიარქი ილია II გადაეყენებინათ და მის ნაცვლად პატრიარქის მოსაყდრე შიო დაეყენებინათ ახალ პატრიარქად.
სავარაუდო შეხვედრის მონაწილეებმა, მეუფე იაკობის სიტყვები არ დაადასტურეს.
მოგვიანებით, მეუფე იაკობი პატრიარქის ქორეპისკოპოსის თანამდებობიდან გადადგა და განაცხადა, რომ გადაწყვეტილება თავად მიიღო.