ევროკომისია თვლის, რომ ხორვატიამ შეასრულა "აუცილებელი პირობები" შენგენის ზონაში შესასვლელად. ნათქვამია ევროკომისიის სპეციალურ ანგარიშში, რომელიც დღეს გამოქვეყნდა. იტყობინება Politico.
"მე მჯერა, რომ წევრი სახელმწიფოები გადადგამენ ნაბიჯებს იმის უზრუნველსაყოფად, რომ უახლოეს მომავალში ხორვატია გახდეს შენგენის ზონის სრულუფლებიანი წევრი", - თქვა ევროკომისიის პრეზიდენტმა ჟან-კლოდ იუნკერმა აღნიშნულ საკითხზე კომენტირებისას.
ევროკავშირის კანონმდებლობის მიხედვით, ევროკავშირის ქვეყნებმა, რომელთაც სურთ შენგენის ზონაში გაწევრიანება, უნდა გაიარონ მთელი რიგი შეფასებები, რათა დაადასტურონ, რამდენად შესწევთ უნარი დააკმაყოფილონ ევროკავშირის მოთხოვნები. მაგალითად, შეუძლია თუ არა ქვეყანას პასუხისმგებლობა აიღოს სხვა სახელმწიფოებთან სასაზღვრო კონტროლზე.
ახლა უკვე ევროკომისია თავის დასკვნას წარუდგენს ევოპის საბჭოს, რომელმაც საბოლოო გადაწყვეტილება უნდა მიიღოს.