სირიის ჩრდილოეთით თურქეთის სამხედრო ოპერაციის დროებით შეჩერების გადაწყვეტილებას, მიკრობლოგ "ტვიტერზე" ეხმიანება თურქეთის პრეზიდენტი რეჯებ ტაიპ ერდოღანი, რომელიც შეერთებული შტატების პრეზიდენტს მიმართავს.
"ბატონო პრეზიდენტი, კიდევ უფრო მეტ სიცოცხლეს გადავარჩენთ, როდესაც დავამარცხებთ ტერორიზმს, რომელიც არის კაცობრიობის დაუძინებელ მტერი. დარწმუნებული ვარ ჩვენი ერთობლივი ძალისხმევა, ხელს შეუწყობს რეგიონში მშვიდობისა და სტაბილურობის დასადგურებას“, - დაწერა ერდოღანმა მიკრობლოგ "ტვიტერზე“.
შეგახსენებთ, გუშინ, 17 ოქტომბერს, აშშ-ის ვიცე-პრეზიდენტ მაიკ პენსსა და სახელმწიფო მდივან მაიკ პომპეოსთან, ანკარაში გამართული შეხვედრის შემდეგ, თურქეთი დათანხმდა დროებით შეაჩეროს სამხედრო ოპერაცია სირიაში.
"თურქული მხარე შეაჩერებს სამხედრო ოპერაციას, რათა ქურთების სახალხო შენაერთები უსაფრთხო ზონიდან გავიდნენ მომდევნო 120 საათის განმავლობაში. ხოლო ოპერაცია სრულად შეწყდება მას შემდეგ, რაც აღნიშნული ძალები გავლენ", - განაცხადა მაიკ პენსმა.
მაიკ პენსის თქმით, აშშ მზად არის გააუქმოს სანქციები თურქეთის ორი მინისტრისა და სამი ოფიციალური პირის მიმართ, როდესაც ჩრდილოეთ სირიაში ცეცხლის შეწყვეტა განხორციელდება.
აშშ-თურქეთის მოლაპარაკებების შედეგებს აღფრთოვანებით შეხვდა დონალდ ტრამპი, რომელმაც შეაქო თურქეთის პრეზიდენტი.
თურქეთმა სირიის ჩრდილოეთით სამხედრო ოპერაცია "მშვიდობის წყარო", 9 ოქტომბერს დაიწყო.
ანკარა აცხადებს, რომ სამხედრო ოპერაცია მიმართულია ტერორისტული დაჯგუფების, "ისლამური სახელმწიფოს" და ქურთების შეიარაღებული ფორმირებების წინააღმდეგ.
სირიაში დაწყებული სამხედრო ოპერაციის გამო, შეერთებული შტატების სახაზინო დეპარტამენტმა სანქციები დაუწესა თურქეთის შინაგან საქმეთა და ენერგეტიკის მინისტრებს, ასევე, თავდაცვისა და ენერგეტიკის სამინისტროებს.
