თურქეთის ხელისუფლება ელექტრონული სიგარეტების გაყიდვასა და იმპორტის აკრძალვას გეგმავს. ამის შესახებ ჯანდაცვის მინისტრმა ფაჰრეთინ ქოჯამ განაცხადა.
"ელექტრონული სიგარეტების გაყიდვა და იმპორტი აიკრძალება. ჩვენ შესაბამის კანონმდებლობაზე ვმუშაობთ", - განუცხადა მან სააგენტო Anadolu-ს.
ქოჯას თქმით, საკითხს პარლამენტი განიხილავს.
თუმცა ჯანდაცვის სამინისტროს წარმომადგენლები ამბობენ, რომ საბოლოო დასკვნების გამოტანა ნაადრევია.
აშშ-ის დაავადებების პროფილაქტიკისა და კონტროლის ცენტრის ინფორმაციით, ვეიპინგის მოყვარულთა შორის ფართოდ გავრცელდა ფილტვებისა და რესპირატორული დაავადებები. დაავადების სავრაუდო მიზეზი არის Е ვიტამინის შემცველი ზეთი.
მანადე ელექტროსიგარეტის მოხმარება, წარმოება, რეალიზაცია და რეკლამირება აიკრძალა ინდოეთში.
შეგახსენებთ, გასულ თვეს, ნიუ იორკი გახდა აშშ-ის მეორე შტატი, სადაც ელექტროსიგარეტის მოხმარება აიკრძალა. მანამდე შესაბამისი აკრძალვა მიჩიგანის შტატში დააწესეს.
ცოტა ხნის გავრცელდა ინფორმაცია, რომ ტრამპის ადმინისტრაცია გეგმავს არომატიზებული ელექტროსიგარეტების ამკრძალავი ფედერალური კანონის შემუშავებას.
აგვისტოში, ილინოისის შტატში საავადმყოფოში გარდაიცვალა მამაკაცი, რომლის გარდაცვალების მიზეზი შესაძლოა ელექტროსიგარეტი ყოფილიყო.
აშშ-ის დაავადებათა კონტროლის ცენტრის ინფორმაციით, გაზრდილია ელექტრონული სიგარეტის გამოყენების შემდეგ რესპირატორული დაავადებების სიმპტომების მქონე ადამიანების ჰოსპიტალიზება.
მათივე განცხადებით, ისინი აკვირდებიან 193 შემთხვევას, რომელიც 28 ივნისიდან აგვისტოს ჩათვლით მოხდა. 193-ვე პაციენტი ელექტრონული სიგარეტის მომხმარებელია.
ოფიციალური ორგანოები თავს იკავებენ იმის მტკიცებისგან, რომ დაავადებების გამომწვევი მიზეზი ელექტრონული სიგარეტია, თუმცა ვარაუდობენ, რომ დიდი ალბათობით, ეს შეიძლება იყოს სპეციალური სითხე, რომელიც გამოიყენება ელექტორნულ სიგარეტში.
როგორც დაავადებათა კონტროლი აცხადებდა, ყველა პაციენტს მსგავსი სიმპტომები აღენიშნებოდა, სუნთქვის გაძნელება, ქოშინი, ტკივილი გულ-მკერდის არეში. ზოგიერთ შემთხვევაში კი დიარეა და ღებინება.