ქალი ადამიანია, მას აქვს თავისი ემოციები და ნერვები და ის არ უნდა მიიყვანო იქამდე, რომ ეს ნაბიჯი გადადგას, - განაცხადა იუსტიციის მინისტრმა თეა წულუკიანმა პარლამენტში დამოუკიდებელ დეპუტატ ეკა ბესელიასა და საპარლამენტო უმრავლესობის წევრ ვანო ზარდიაშვილს შორის მომხდარ სიტყვიერ და ფიზიკურ დაპირისპირებასთან დაკავშირებით გადაცემაში "კვირის თემა".
"რა ჭრილში არ შევხედე ამ საკითხს და რა მიმართულებით არ შევეცადე, ყველანი ვრჩებით ჩვენს თავთან დღის განმავლობაში მარტო, რაღაც მომენტში და რა ლოგიკითაც არ შევხედე ამ საკითხს, ერთადერთ დასკვნამდე მივედი, ყოველ შემთხვევაში ჩემთვის, რომ ამ ინციდენტში არავისთვის არაფერი პოზიტიური არ იყო. ისიც ვთქვი და თქვენი ეთერით კიდევ გავიმეორებ, რომ თვალში საცემი და აბსოლუტურად აუტანელი იყო ჩემთვის, რომ იმ საღამოსვე და ეს დღემდე გრძელდება, ეკა ბესელიას კრიტიკა, რომ როგორ თუ მან ეს გააკეთა. ეს რომ გააკეთა, ალბათ თავად იცის, რომ მისთვის მაინცდამაინც სახარბიელო არ იყო, მაგრამ ქალიც ადამიანია. ქალი ადამიანის მეგობარია, - ალბათ ზოგს დღესაც ასე ჰგონია, მაგრამ ქალი ადამიანია, მას აქვს თავისი ემოციები და ნერვები და ის არ უნდა მიიყვანო იქამდე, რომ ეს ნაბიჯი გადადგას. ალბათ, მან ჩვენზე კარგად იცის, ეს კარგი იყო თუ ცუდი, ამიტომ მე ამის შემფასებლური და ჭკუის დამრიგებლური როლი ვერ მექნება. მაგრამ წეღან ვამბობდი, რომ აუტანელი იყო ის, რომ დაიწყო მისი კრიტიკა. ასეთი მწვავე და ასეთი კრიტიკა მე არ მახსოვს, როდესაც მელია და კვირიკაშვილი, პირდაპირ ამ სიტყვის მნიშვნელობით, გაეჯგიმნენ ერთმანეთს პარლამენტში. გახსოვთ ხომ, ეს იყო ყველაზე ბოლოს, მანამდე იყო ზვიადაურსა და სხვებს შორის დაპირისპირება", - თქვა წულუკიანმა.
მისივე თქმით, ზოგადად პარლამეტში ასეთი რამ ყველა ქვეყანაში ხდება, იმიტომ რომ, უშუალოდ ერთმანეთთან ახლოს არიან პოლიტიკურად დაპირისპირებული ადამიანები და ხდება, რომ ადამიანი ვერ იკავებს თავს.
"მაგრამ რაც ნაკლები იქნება ასეთი შემთხვევები, რა თქმა უნდა, პარლამენტს ეს უფრო შეფერის, ვიდრე ჩხუბი და ხელით შეხება ერთმანეთისადმი. მეორეს მხრივ, ასევე მნიშვნელოვანია, რომ ქალი დეპუტატი ძალიან ცოტა იყო წარსულში, ახლა ცოტა მეტია, იმედი მაქვს, რომ უფრო მეტი და მეტი ახალგაზრდა ქალი შევა პარლამენტში და კაცმა დეპუტატებმა, რომლებიც ახლა ქალ დეპუტატს მოუწოდებენ ქცევის კორექტირებისკენ და თავშეკავებისკენ, თვითონ გაიაზრონ, რომ ქალთა მონაწილეობის ინსტიტუტს პოლიტიკაში უფრო მეტად მოუფრთხილდნენ. აღარაფერს ვამბობ და მგონი, ჩვენს შეფასებას არ იმსახურებს ის ფაქტი, რომ ქალს რაღაც წამოაძახო", - თქვა წულუკიანმა.