ესტონეთის საგარეო საქმეთა სამინიტრომ მიკრობლოგ "ტვიტერზე" უპასუხა რუსეთის საგარეო საქმეთა სამინიტროს მიერ ასევე მიკრობლოგ "ტვიტერზე" გავრცელებულ განცხადებას იმასთან დაკავშირებით, რომ საბჭოთა ჯარებმა "გაათავისუფლეს“ ესტონეთი.
"ჩვენ ვუარყოფთ რუსეთის საგარეო საქმეთა სამინისტროს მიერ გაჟღერებულ ისტორიულ უზუსტობას, რომ თითქოსდა საბჭოთა ჯარებმა ესტონეთი გაათავისუფლეს. ეტონეთის რესპუბლიკას მონაწილეობა არ მიუღია მეორე მსოფლიო ომში, რადგან ის ოკუპირებული იყო, როგორც ნაცისტური გერმანიის, ასევე საბჭოთა რუსეთის მიერ. ეს ეგრეთ წოდებული "გათავისუფლება" იყო ოკუპაცია, რომელიც 50 წელს გაგრძელდა", - დაწერა ესტონეთის საგარეო უწყებამ.
მანამდე რუსეთის საგარეო საქმეთა სამინიტრო მიკრობლოგ "ტვიტერზე" წერდა, რომ დღევანდელ მსოფლიოში მიმდინარეობს ისტორიის გაყალბება და ძალისხმევას არ იშურებენ, რათა მეორე მსოფლიო ომის ისტორია გაყალბდეს.
"სამწუხაროდ, ეს ხდება ესტონეთშიც. თუმცა არსებობს დოკუმენტები, თუ როგორ ესალმებოდა 1944 წელს ტალინის მოსახლეობა საბჭოთა არმიას, როგორც გამათავისუფლებლებს, რომლებმაც გაათავისუფლეს ესტონეთი ფაშიტების ოკუპაციისგან.
შეგახსენებთ, რომ ბევრი ესტონელი იმყოფებოდა წითელარმიელ ჯარისკაცებს შორის, რომლებიც ტალინში შევიდნენ", - დაწერა რუსეთის საგარეო საქმეთა სამინისტრომ "ტვიტერზე".
საბჭოთა კავშირმა ესტონეთის ოკუპაცია 1940 წლის ივნისში მოახდინა, მაშინ როცა მთელი მსოფლიოს ყურადღება მიპყრობილი იყო ნაცისტური გერმანიის არმიის მიერ პარიზის დაპყრობისკენ.
ერთი წლის შემდეგ, საბჭოთა ოკუპაციას, ნაცისტური გერმანიის ანექსია მოჰყვა. საბოლოოდ, საბჭოთა კავშირმა 1944 წელს კვლავ მოახერხა ესტონეთის მიტაცება, რომელიც საბჭოთა იმპერიის შემადგენლობაში, მის დაშლამდე, 1991 წლამდე შედიოდა.
