უზენაეს სასამართლოში მოსამართლეების დანიშვნის პროცედურა ევროკავშირის წევრი სახელმწიფოების დედაქალაქების ყურადღების ცენტრშია - განაცხადა ევროპული სამეზობლო პოლიტიკისა და გაფართოების საკითხებში ევროკომისარმა იოჰანეს ჰანმა საქართველოს მთავრობის ადმინისტრაციაში, პრემიერ-მინისტრ გიორგი გახარიასთან ერთად გამართულ ბრიფინგზე.
იოჰანეს ჰანის თქმით, ევროკავშირი რჩება საქართველოში წარმატებული ძალისხმევის და რეფორმების მტკიცე პარტნიორად და მხარდამჭერად.
"ევროკავშირი რჩება საქართველოში წარმატებული ძალისხმევის და რეფორმების მტკიცე პარტნიორად და მხარდამჭერად. ჩვენ შევთანხმდით, რომ ეს ძალისხმევა უნდა გაგრძელდეს, განსაკუთრებით სამართლის უზენაესობის, სასამართლო სისტემის მიმართულებით. არსებული პროცესი, რომელიც მიმდინარეობს და უზენაეს სასამართლოში მოსამართლეების დანიშვნას გულისხმობს, არა მარტო ბრიუსელის, არამედ ევროკავშირის წევრი სახელმწიფოების დედაქალაქების ყურადღების ცენტრშია. ჩვენ ყველაფერს ვაკეთებთ იმისათვის, რომ აქცენტი გაკეთდეს თანაბარ უფლებებზე.
ჩვენ პრემიერ-მინისტრთან საუბარში ხაზი გავუსვით, რომ მნიშვნელოვანია ყველა ის რეკომენდაცია, რომელიც გასცა ეუთომ, განსაკუთრებით 2020 წლის არჩევნებისთვის. ეს იქნება გარანტი იმისა, რომ გამჭვირვალე იყოს არჩევნები და უზრუნველყოფილი იქნას პლურალისტური და თანაბარი მედია გარემო. ეს ყველაფერი ხელს შეუწყობს თავისუფალ და დემოკრატიულ განვითარებას", - თქვა იოჰანეს ჰანმა.
ევროკომისარმა ისაუბრა ასევე საოკუპაციო ხაზთან არსებული მდგომარეობისა და უკანონო ბორდერიზაციის შესახებ და განაცხადა, რომ ევროკავშირი მომავალშიც ეჭვის გარეშე, მიზანმიმართულ ხაზს შეინარჩუნებს საქართველოს სუვერენიტეტისა და ტერიტორიული მთლიანობის მხარდაჭერის მიმართულებით საერთაშორისოდ აღიარებული საზღვრებს ფარგლებში.
"უნდა ვთქვა, რომ მომავალშიც ეჭვის გარეშე, მიზანმიმართულ ხაზს ვინარჩუნებთ საქართველოს სუვერენიტეტისა და ტერიტორიული მთლიანობის მხარდაჭერის მიმართულებით საერთაშორისოდ აღიარებული საზღვრებს ფარგლებში. ადმინისტრაციულ საზღვარზე სამხრეთ ოსეთთან წერტილები, რომელიც ბორდერიზაციის მიმართულებით აქტუალურია, ჩვენთვის მიუღებელია. კონსტრუქციული ჩართულობა, განსაკუთრებით, ჟენევის საერთაშორისო დისკუსიების ფორმატში რუსეთის მონაწილეობით, ჩვენთვის მნიშვნელოვანია.
საქართველო უნდა იყოს ძლიერი, გაერთიანებული. მიმდინარე გამოწვევების ფონზე ეს საკითხები აქტუალურია. ხალხისთვის, რომელიც ორივე მხარეს ცხოვრობს, გათვალისწინებულია იმ ინიციატივებში, რომელიც თქვენს მიერ ხორციელდება, საჭირო მომსახურებების კუთხით. ეს ჩვენთვისაც მნიშვნელოვანია. საბოლოო ჯამში, ხალხის ინტერესებშია, რომ ყველა შესაძლებლობა ქმედითად იქნას გამოყენებული იმისათვის, რომ ჯანდაცვის და სხვა საჭირო მომსახურების სფეროში მათ სარგებელი მიიღონ.
მიმაჩნია, რომ თუ ვინმეს აქვს გარკვეული საჭიროებები, ამაზე ყველა უნდა დაფიქრდეს ხელისუფლებაში და იმედს ვიტოვებ, ეს მდგომარეობა გამოსწორდება უახლოეს მომავალში", - განაცხადა იოჰანეს ჰანმა.
