"საქართველოს პატრიოტთა ალიანსის" ლიდერის, პარლამენტის ვიცე-სპიკერის ირმა ინაშვილის მცდელობას, ჩაეშალა თბილისის საერთაშორისო კონფერენცია, რომელიც "მაკკეინის ინსტიტუტი საერთაშორისო ლიდერობისთვის" და "ეკონომიკური პოლიტიკის კვლევის ცენტრის" მიერ არის ორგანიზებული, შედეგი არ მოჰყოლია, თუ არ ჩავთვლით მცირე დროით ხმაურსა და კამათს.
საბოლოოდ ირმა ინაშვილმა მაინც მოახერხა კონფერენციაზე დასწრება და სიტყვით გამოსვლა.
"არაფერი პროვოკაცია არ ყოფილა, და არც მომხდარა. ჩვენ ვართ ცივილიზებული ადამიანები და ყოველთვის მომხრე ვართ სიმშვიდის, წესრიგის და არა დესტრუქციის.
ძალიან საინტერესო კონფერენციაა, რომელიც მიმდინარეობს საქართველოში და ძალიან საინტერესო გამომსვლელები არიან.
სამწუხაროა, რომ ჩვენი საპარლამენტო პარტია არ იყო მოწვეული ამ კონფერენციაზე, თორემ მივიღებდით მონაწილეობას აუცილებლად.
როცა მე ვიყავი ჟურნალისტი, დაახლოებით 18-19 წლის და ვაშუქებდით აშშ-ში საქართველოს მაშინდელი პრეზიდენტის ვიზიტებს, მაშინ ჩვენ ამერიკელი პოლიტიკოსები გვეუბნებოდნენ, რომ იცით, რა არის მთავარი მონაპოვარი? პოლიტიკური პლურალიმზი, ეს არის დემოკრატია.
პოლიტიკური პლურალიზმი ნიშნავს იმას, რომ როდესაც ჩემზე, როგორც პარტიაზე ლაპარაკობენ კონფერენციის მონაწილეები და გუშინ ჩვენზე იყო დიდხანს საუბარი, მეც უნდა მქონდეს გამოსვლის საშუალება.
რამდენიმე, ცოტა არ იყოს ცინიკური შეფასება მოვისმინე სხვადასხვა დარბაზში მსხდომი წარმომადგენლისგან, მომხსენებელს არ ეხება, და მინდა, გამოვეხმაურო ასევე გუშინ ბატონი ბოკერიას გამოსვლას, რომელმაც ძირითადად ჩვენზე ილაპარაკა.
ჩვენ ვართ ჩვენი ქვეყნის პატრიოტები, საქართველოს პატრიოტები პირველ რიგში, ჩვენ ვაფასებთ დასავლეთის დახმარებას და ურთიერთობას ჩვენს საერთაშორისო პარტნიორებთან. მაგრამ ის რაც გუშინ ჩვენზე ითქვა და ბევრი ციტატა დამახინჯებულად იყო აქ წარმოდგენილი ბატონი ბოკერიას მხრიდან, ეს არის ტყუილი, ტყუილი და ცილისწამება.
ისინი ცდილობენ, ბოკერია-სააკაშვილები, თქვენზე შეინარჩუნონ მონოპოლია და თქვენ მუდმივად გიმტკიცებდნენ, რომ ჩვენ ვართ პროდასავლურები, ხოლო ესენი ქვეყნის მტრები და აგენტები არიან, ჩვენ ანუ, ქართველი ხალხი.
დასავლურობა მათ როგორ ესმით იცით? როგორც ადამიანთა წამება, რასაც აკეთებდნენ, მიტინგების დარბევა, ბიზნესმენებისთვის ქონების წართმევა, რასაც აკეთებდა სააკაშვილი და ბოკერია, არჩევნების გაყალბება, ქვეყნის ტერიტორიების 22 %-ის ჩაბარება მოწინააღმდეგეებისთვის.
ადამიანთა წამება, მკვლელობა, აქციების დარღვევა ეს დასავლური ღირებულებებია? მე ზუსტად ვიცი, რომ ეს არ არის დასავლური ღირებულებები. ეს არის ბოლშევიზმი და ფაშიზმი.
ჩვენ ვართ, ჩვენ, საქართველოს პატრიოტები, ნამდვილად ქართული პარტია და დასავლური აზროვნების პარტია. ამიტომ, იცოდეთ როცა ბოკერიები, სააკაშვილები და მათი ექსპერტები ჩვენზე საუბრობენ, ყველაფერი ტყუილია", - თქვა ირმა ინაშვილმა.
შეგახსენებთ, თბილისში მიმდინარე საერთაშორისო კონფერენციაზე "პატრიოტთა ალიანსის" ლიდერის და ტელეკომპანია "ობიექტივის" ჟურნალისტის გამოჩენას ხმაური მოჰყვა. ირმა ინაშვილი სიტყვით გამოსვლას მოითხოვდა, მიუხედავად იმისა, რომ ის არ იყო მიწვეული კონფერენციაზე.