ევროპისა და ევრაზიის საკითხებში აშშ-ის სახელმწიფო მდივნის თანაშემწის მოვალეობის შემსრულებელი ფილიპ რიკერი დიპლომატიური კორპუსის რამდენიმე წარმომადგენელთან და უსაფრთხოების ექსპერტებთან ერთად სოფელ ოძისში ჩავიდა.
„რუსული ტაქტიკა ყოველი ჩვენგანისთვის კარგად ნაცნობია. ჩვენთვის დიდი მღელვარების საგანია რუსეთის ძალისხმევა, გავლენა მოახდინოს სხვადასხვა მეთოდით, მათ შორის სამხედროების განლაგებითა და განახლებული მილიტარიზაციით. აქვეა რუსეთის დროშა. თქვენ არ დაგჭირდებათ შორს ყურება, რომ რუსეთის ძალისხმევა დაინახოთ. არსებობს მექანიზმები, რომლის მეშვეობითაც უნდა მოგვარდეს მიმდინარე სიტუაცია. 2008 წელს რუსეთმა აიღო ვალდებულებები, გაეყვანა ჯარი კონფლიქტამდე არსებულ პოზიციებზე. მათ არ შეასრულეს ეს ვალდებულებები და განაგრძობენ საქართველოს ერთი მეხუთედის ოკუპაციას. ამ მოქმედების სქემას სხვაგანაც ვხედავთ, მაგალითად უკრაინაში და ჩვენ ეს ძალიან გვაწუხებს. უკვე ათწლეულია ვხედავთ რუსეთის ამგვარ ქმედებას, მავნებელ, უკანონო ძალისხმევას იმ ინტერესების წინააღმდეგ, რომლის ხელშეწყობაც ჩვენ ყველას გვსურს უფრო სტაბილური და მშვიდობიანი ევროპისთვის" - აცხადებს ფილიპ რიკერი.