საქართველოს აზიის განვითარების ბანკის წარმომადგენლობითი მისია სტუმრობს. აზიის განვითარების ბანკის დირექტორთა საბჭოს თავმჯდომარემ აშოკ კუმარ ლახირიმ პირველი შეხვედრები ბათუმში გამართა. დღის მეორე ნახევარში კი მისია თბილისს ეწვევა. ცენტრალური ხელისუფლების წარმომადგენლებთან კონსულტაციებისას საუბარი აზიის განვითარების ბანკისგან საქართველოსთვის მორიგი კრედიტის პირობებზე წარიმართება.
100 მლნ. დოლარიანი კრედიტის ვადა 15 წელია, საშეღავათო პერიოდი კი სამი წელი. კრედიტის წლიური განაკვეთი აზიის განვითარების ბანკის "ლიბორ"-ის მიხედვით განისაზღვრება. საქართველო სესხს ტრანშების სახით _ სამ ნაწილად მიიღებს.
სესხი აზიის განვითარების ბანკის მიერ საქართველოსთვის უკვე გადმოცემულ 70 მლნ დოლარსა და 2009 წელს გლობალური კრიზისის ზეგავლენის შერბილების მიზნით გამოყოფილ 80 მლნ დოლარს დაემატება.
აღსანიშნავია, რომ ფინანსთა მინისტრმა კახა ბაინდურაშვილმა მსოფლიო ბანკის კრედიტების საქართველოში ინვესტირების შესახებ ჯერ კიდევ წლის დასაწყისში განაცხადა. მისი ინფორმაციით, 2010 - 2011 წლებში მსოფლიო ბანკი ქვეყანაში ერთი მილიარდი აშშ დოლარის ინვესტიციას ჩადებს. ძირითადად, ეს სახელმწიფო კრედიტებია, რომლებიც ინფრასტრუქტურის განვითარებაზე დაიხარჯება. მაგალითად, გზების რეაბილიტაციისთვის აზიის განვითარების ბანკმა საქართველოს 500 მილიონი აშშ დოლარი გამოუყო. ასევე, აზიის განვითარების ბანკის ინვესტიცია დაიხარჯება წყალმომარაგების სისტემების რეაბილიტაციისა და თბილისის სატრანსპორტო სისტემის მოწესრიგებისათვის.
ბანკის მისია საქართველოში აზერბაიჯანიდან ჩამოვიდა, ხოლო საქართველოდან 30 სექტემბერს სომხეთში ჩავა. სამხრეთ კავკასიურ ტურნეს ბანკის მისია 4 ოქტომბერს დაასრულებს.