რუსეთის საგარეო საქმეთა სამინისტრო, მეორე მსოფლიო ომის დაწყებიდან 80 წლის იუბილესთან დაკავშირებით აცხადებს, რომ სსრკ-მა იხსნა ევროპული დემოკრატია განადგურებისგან. შესაბამისი განცხადება რუსეთის საგარეო უწყების სოციალურ ქსელ „vkontakte"-ზე გამოქვეყნდა.
რუსული სააგენტო „რია" იტყობინება, რომ ამრიგად, რუსეთის საგარეო საქმეთა სამინისტრო შეახსენებს საზოგადოებას, რომ სწორედ საბჭოთა კავშირმა დაამარცხა ნაცისტური გერმანია და გაათავისუფლა ევროპა.
რუსეთის საგარეო უწყება თავის მიერ გავრცელებულ განცხადებაში შენიშნავს, რომ თანამედროვე მსოფლიოში, ზოგიერი ქვეყანა ცდილობს გადახედოს ომის შედეგებსა და მიზეზებს, თანაბრად დაადანაშაულოს ჰიტლერი და სსრკ-ი, რათა ჩრდილო მიაყენოს რუსეთის ფედერაციას.
შეგახსენებთ, დღეს, პოლონეთში აღინიშნება მეორე მსოფლიო ომის დაწყებიდან 80 წლის იუბილე, რომელსაც მსოფლიოს სხვადასხვა ქვეყნების ლიდერები ესწრებიან.
პოლონეთის პრეზიდენტმა ანჯეი დუდამ აღნიშნულ ღონისძიებაზე არ მიიწვია რუსეთის პრეზიდენტი ვლადიმერ პუტინი.
პუტინისადმი სოლიდარობით განწყობილმა ბელარუსის პრეზიდენტმა ალექსანდრ ლუკაშენკომ უარი განაცხადა ღონისძიებაზე დასწრებაზე.
ღონისძიებას ასევე არ ესწრებიან სომხეთის ხელისუფლების უმაღლესი თანამდებობის პირები.