კონგოში იმ ადამიანთა რიცხვმა, რომელიც ერთ-ერთმა ყველაზე საშიშმა ვირუსმა ებოლამ იმსხვერპლა, 2 000-ს გადააჭარბა. ინფორმაციას კონგოს დემოკრატიული რესპუბლიკის მთავრობა აქვეყნებს.
ვირუსის გავრცელების მასშტაბების გამო მეზობელი ქვეყნები აძლიერებენ უსაფრთხოების მექანიზმებს. ერთი თვის წინ, ებოლაც გავრცელების მომეტებული საფრთხის გამო კონგოს მეზობელმა რუანდამ საზღვრები ჩაკეტა.
კონგოში მომუშავე არასამთავრობო ორგანიზაციები ვაქცინას უკეთებენ ყველას, ვისაც კი შეხება ჰქონია ებოლას ვირუსის მქონე ადამიანთან, თუმცა პროცესი გაძნელებულად მიმდინარეობს, რადგან კონგოელთა ნაწილი ცრურწმენების გამო ეჭვის თვალით უყურებს ვაქცინაციას და უარს ამბობს მის გაკეთებაზე.
კონგოს მეზობლად მდებარე უგანდის რესპუბლიკის განცხადებით, ქვეყანაში ებოლას ვირუსით დაიღუპა 9 წლის გოგონა, რომელმაც კონგოდან გადმოკვეთა საზღვარი.
აღსანიშნავია, რომ უგანდაში მუშაობენ დიდი ზომის სკრინინგ ცენტრები, რომლებიც განლაგებულები არიან კონგოსთან სასაზღვრო გამშვებ პუნქტებთან, რათა თავიდან აიცილონ ვირუსის შემოსვლა.
ივნისში უგანდაში ებოლას ორი შემთხვევა დაფიქსირდა.
ჯანდაცვის მსოფლიო ორგანიზაცია ებოლას ვირუსით გამოწვეულ ვითარებას მსოფლიოს „ერთ-ერთ ყველაზე რთულ და კომპლექსურ ჰუმანიტარულ კრიზისს" უწოდებს.
კონგოს შესაბამისი ოფიციალური უწყებების ინფორმაციით, ამ დროისთვის ებოლას 3000-მდე შემთხვევაა დაფიქსირებული.
ებოლას ყველაზე მასშტაბური ეპიდემიური აფეთქება 2014-2016 წლებში დაფიქსირდა, რომელმაც მოიცვა დასავლეთ აფრიკის ნაწილი და საბოლოოდ 11 000-ზე მეტი ადამიანის სიცოცხლე იმსხვერპლა.
ებოლას ვირუსი 1976 წელს ზაირში აღმოაჩინეს.