ბრაზილიის ცხრა შტატის გუბერნატორი, რომლებიც ყველაზე მეტად დაზარალდნენ ამაზონის ტყის ხანძრების გამო, მოუწოდებენ ქვეყნის პრეზიდენტს, ჟაირ ბოლსონარუს, უარი არ თქვას ნახანძრალი ტყეების აღსადგენად საერთაშორისო დახმარების მიღებაზე.
მანამდე ჟაირ ბოლსონარუმ უარი თქვა დიდი შვიდეულის ქვეყნების 22-მილიონიან დახმარებაზე, რომლის შესახებაც ინფორმაცია თავდაპირველად საფრანგეთის პრეზიდენტმა ემანუელ მაკრონმა ბიარიცში, G7-ის სამიტის ფარგლებში გაახმოვანა.
BBC-ის ინფორმაციით, ჟაირ ბოლსონარუმ თავისი უარყოფითი პოზიცია გუბერნატორებთან შეხვედრის შეცვალა.
ბოლსონარუს თქმით, ის დათანხმდება ფინანსური დახმარების მიღებას თუ მიეცემა საშუალება, სახსრები თავად განკარგოს.
მეოთხე კვირაა ბრაზილიაში რეკორდული რაოდენობის ტყის მასივები იწვის. მათი უმეტესობა ამაზონის რეგიონში მდებარეობს.
შეგახსენებთ, რომ ამაზონის ჯუნგლები დედამიწის ჟანგბადის 20 პროცენტს გამოიმუშავებს და იქ უკვე რამდენიმე კვირაა ტყის მასივი იწვის.
ჯუნგლებში გაჩენილი ხანძრები ეკოლოგიურ კატასტროფად შეაფასა საფრანგეთის პრეზიდენტმა და სასწრაფოდ მოითხოვა დიდი შვიდეულის შეკრება. სამიტზე ბრაზილიის დასახმარებლად სწრაფი წესით გამოიყო 22 მილიონი ევრო, რომელიც ჯუნგლებში ტყის აღდგენას უნდა მოხმარებოდა. აღნიშნული დახმარება ბრაზილიამ არ მიიღო, საფრანგეთის პრეზიდენტი კოლონიალურ მენტალობაში დაადანაშაულა და შეახსენა, რომ ბრაზილიაში ცეცხლის ჩაქრობის ნაცვლად სჯობს საკუთარი ქვეყნის პრობლემების მოგვარებით დაკავდეს.
26 აგვისტოს გავრცელებული ინფორმაციით, აფრიკაში, კონგოს დემოკრატიულ რესპუბლიკასა და უგანდაში ამაზონის ჯუნგლებში გაჩენილი ხანძრის კერაზე 5-ჯერ მეტი რაოდენობა იწვის.
ერთი თვის წინ კი ციმბირში ათობით ათასი კვადრატული მეტრი ტყე დაიწვა.
მეცნიერები 2019 წელს ერთ-ერთ ყველაზე კატასტროფულ წლად აფასებენ და აცხადებენ, რომ ეს პროცესები გლობალური დათბობის პროცესებს კიდევ უფრო აჩქარებს.
ფოტო: Reuters