ამერიკული კორპორაცია Apple-ი ამაზონის ნახანძრალი ტყეების აღსადგენად ფინანსურ დახმარებას გაიღებს. ამის შესახებ მიკრობლოგ "ტვიტერზე" კორპორაციის აღმასრულებელმა დირექტორმა ტიმ კუკმა დაწერა.
"ძალიან შემაშფოთებელია იმის ნახვა, თუ როგორ ანადგურებს ამაზონის ტყის ხანძრები მსოფლიოს ერთ-ერთ ყველზე მნიშვნელოვან ეკოსისტემას. Apple-ი ფინანსურ დახმარებას გამოყოფს, რათა ხელი შეუწყოს ტყის აღდგენისა და ბიომრავალფეროვნების შენარჩუნებას ლათინური ამერიკის მასშტაბით", - დაწერა ტიმ კუკმა.
აღსანიშნავია, რომ ტიმ კუკს არ დაუკონკრეტებია ფინანსური დახმარების ოდენობა.
შეგახსენებთ, ამაზონის ტყეების აღსადგენად თანხის გამოყოფის შესახებ გადაწყვეტილება მსოფლიოს ლიდერებმა დიდი შვიდეულის სამიტზეც მიიღეს, თუმცა ბრაზილიის ხელისუფლებამ დახმარების მიღებაზე უარი განაცხადა.
ბოლო ორი დღის განმავლობაში ხანძრის ფართობი 1500 კვ/კმ-ით გაიზარდა.