დღეს, ბიარიცში, დიდი შვიდეულის სამიტის ფარგლებში, შეერთებული შტატების პრეზიდენტმა შეაქო გერმანიის კანცლერი ანგელა მერკელი და მას "ბრწყინვალე ქალი" უწოდა.
ამასთანვე, ტრამპა სურვილი გამოხატა, რომ ანგელი მერკელი "კიდევ დიდხანს იყოს გერმანიის კანცლერი".
"ის ბრწყინვალე ქალია, ის ყველაფერს ზუსტად ხვდება, იმაზე უფრო ადრე, ვიდრე ადამიანების უმრავლესობა", - განუცხადა ტრამპმა ჟურნალისტებს ანგელა მერკელთან ორმხრივი შეხვედრის დროს.
ტრამპმა ასევე აღნიშნა, რომ ის ძალიან მალე გერმანიას სახელმწიფო ვიზიტით ეწვევა.
მისივე თქმით, იგი უაღრესად კმაყოფილია ანგელა მერკელის მიწვევით.
"ჩემს ძარღვებში გერმანული სისხლიც არის", - დასძინა ტრამპმა.
მოგვიანებით, მერკელმა ჟურნალისტებს განუცხადა, რომ ტრამპის ვიზიტის კონკრეტული თარიღი ჯერჯერობით არ შეუთანხმებიათ.
როგორც დასავლური მედია წერს, ტრამპისა და მერკელის ორმხრივმა შეხვედრამ უაღრესად თბილ და მეგობრულ ვითარებაშ ჩაიარა.
ჟურნალისტებმა ჰკითხეს ტრამპს, აგდებდა თუ არა საგონებელში ის ფაქტი, რომ მომავალში დიდი შვიდეული ერთადერთ ქალ ლიდერს დაკარგავს, როდესაც მერკელი თანამდებობას დატოვებს.
"მან [მერკელმა] შეიძლება ყველა გაგაკვირვოთ. ის შეიძლება კიდევ დიდხანს დარჩეს აქ, მე ეს ვიცი“, - ასე უპასუხა ტრამპმა დასმულ შეკითხვას.
"მე ჯერ კიდევ აქ ვარ", - ჩაერთო მერკელიც საუბარში.
შეხვედრის დასასრულს ტრამპმა გააკრიტიკა ევროკავშირი, როგორც „ძალიან მკაცრი სავაჭრო მომლაპარაკებელი“, თუმცა დასძინა, რომ ევროკავშირის წინააღმდეგ პოზიციას არასდროს დაიკავებს და იგი უკმაყოფილოა შტატების წინა პრეზიდენტის და მისი ადმინისტრაციის საქმიანობის გამო, რომელთაც „თავიანთი საქმე არ შეასრულეს“.