საქართველოსა და დსთ-ს ქვეყნებს შორის სავაჭრო ბრუნვა 27 %-ით გაიზარდა. "საქსტატის" ინფორმაციით, დსთ-ის ქვეყნებთან საქართვეოს საგარეო სავაჭრო ბრუნვამ 2010 წლის იანვარ-აგვისტოში 1040 მლნ. აშშ დოლარი შეადგინა (2009 წლის იანვარ-აგვისტოსთან შედარებით 27 პროცენტით მეტი), აქედან ექსპორტი 394 მლნ. აშშ დოლარი დაფიქსირდა (48 პროცენტით მეტი), ხოლო იმპორტი - 926 მლნ. აშშ დოლარი (20 პროცენტით მეტი).
საქართველოს საგარეო სავაჭრო ბრუნვაში ამ ქვეყნების წილი 33 პროცენტი იყო, მათ შორის ექსპორტში 40 პროცენტი და იმპორტში 30 პროცენტი. (2009 წლის იანვარ-აგვისტოში - შესაბამისად 30, 37 და 28 პროცენტი). ამ ქვეყნებზე მოდიოდა სავაჭრო დეფიციტის 25 პროცენტი (2009 წლის იანვარ-აგვისტოში ასევე - 25 პროცენტი).
შეგახსენებთ, რომ 2010 წლის იანვარ-აგვისტოში საქართველოს საგარეო სავაჭრო ბრუნვამ (არაორგანიზებული ვაჭრობის გარეშე) 4051 მლნ. აშშ დოლარი შეადგინა, რაც წინა წლის ანალოგიურ მაჩვენებელზე 17 პროცენტით მეტია; აქედან ექსპორტი 977 მლნ. აშშ დოლარი იყო (35 პროცენტით მეტი), ხოლო იმპორტი - 3074 მლნ. აშშ დოლარი (12 პროცენტით მეტი). საქართველოს უარყოფითმა სავაჭრო ბალანსმა 2010 წლის იანვარ-აგვისტოში 2098 მლნ. აშშ დოლარი შეადგინა (4 პროცენტით მეტი).
2010 წლის იანვარ-აგვისტოში 2008 წლის ანალოგიურ პერიოდთან შედარებით საგარეო სავაჭრო ბრუნვა 24 პროცენტით, ექსპორტი 9 პროცენტით, ხოლო იმპორტი 28 პროცენტით შემცირდა. რაც შეეხება უარყოფით სავაჭრო ბალანსს, 2010 წლის იანვარ-აგვისტოში 34 პროცენტით ნაკლები დაფიქსირდა, ვიდრე 2008 წლის შესაბამის პერიოდში.