იანვარ-აგვისტოში საქართველოს უმსხვილესი საიმპორტო სასაქონლო ჯგუფი ლიდერობას კვლავინდებურად ნავთობი და ნავთობ-პროდუქტები იკავებს.
"საქსტატის" ინფორმაციით, უმსხვილესი საიმპორტო სასაქონლო ჯგუფი 2010 წლის იანვარ-აგვისტოში ნავთობი და ნავთობ-პროდუქტები იყო 411 მლნ. აშშ დოლარით, რომლის წილმა იმპორტში 13 პროცენტი შეადგინა. მეორე ადგილზე იმყოფებოდა მსუბუქი ავტომობილების სასაქონლო ჯგუფი 203 მლნ. აშშ დოლარით, რაც იმპორტის 7 პროცენტი იყო. მესამე ადგილზე კვლავ სამკურნალო საშუალებების ჯგუფი დარჩა 123 მლნ. აშშ დოლარით, რომლის წილმა იმპორტში 4 პროცენტი შეადგინა.
შეგახსენებთ, რომ 2010 წლის იანვარ-აგვისტოში საქართველოს საგარეო სავაჭრო ბრუნვამ (არაორგანიზებული ვაჭრობის გარეშე) 4051 მლნ. აშშ დოლარი შეადგინა, რაც წინა წლის ანალოგიურ მაჩვენებელზე 17 პროცენტით მეტია; აქედან ექსპორტი 977 მლნ. აშშ დოლარი იყო (35 პროცენტით მეტი), ხოლო იმპორტი - 3074 მლნ. აშშ დოლარი (12 პროცენტით მეტი). საქართველოს უარყოფითმა სავაჭრო ბალანსმა 2010 წლის იანვარ-აგვისტოში 2098 მლნ. აშშ დოლარი შეადგინა (4 პროცენტით მეტი).
2010 წლის იანვარ-აგვისტოში 2008 წლის ანალოგიურ პერიოდთან შედარებით საგარეო სავაჭრო ბრუნვა 24 პროცენტით, ექსპორტი 9 პროცენტით, ხოლო იმპორტი 28 პროცენტით შემცირდა. რაც შეეხება უარყოფით სავაჭრო ბალანსს, 2010 წლის იანვარ-აგვისტოში 34 პროცენტით ნაკლები დაფიქსირდა, ვიდრე 2008 წლის შესაბამის პერიოდში.