ეკონომიკისა და მდგრადი განვითარების სამინისტროს ტურიზმის ეროვნული ადმინისტრაციის ორგანიზებით ტურიზმის სექტორის წარმომადგენლებისათვის ტრენინგი გაიმართა.
სემინარი სახელწოდებით „სპარსეთის ყურის ქვეყნების ტურისტული ბაზრის ანალიზი“ საერთაშორისო ტრენერმა კუმუდ სენგუფტამ ჩაატარა.
სემინარს ტურ-ოპერატორები, გიდები და სასტუმროების წარმომადგენლები დაესწრნენ.
სერგუფტას 30 წლიანი სამუშაო გამოცდილება აქვს კვლევის, საკონსულტაციო მომსახურებისა და მარკეტინგის სფეროში და მჭიდროდ თანამშრომლობს გაეროს მსოფლიო ტურიზმის ორგანიზაციასთან (UNWTO)
ტრენინგი შემდეგ თემატიკას მოიცავდა: ტურისტული ბაზრის ანალიზი. (მოგზაურობის კულტურა, ქცევის ეტაპები, ტურისტულ პროდუქტზე ინტერესი, გადამხდელუნარიანობა, მომსახურებაზე მოთხოვნა და სხვა); ტურიზმის ინდუსტრიის ანალიზი (ინდუსტრიის სტრუქტურა და მასთან საქმიანი ურთიერთობის დამყარების მეთოდები) ბაზარზე პოზიციონირება და მარკეტინგი.
„ჩვენთვის ძალიან მნიშვნელოვანია ქართულ ტურიზმის სექტორს მაქსიმალურად შევუწყოთ ხელი, შესაბამისად საგანმანათლებლო პროექტის ფარგლებში, რომელსაც ტურიზმის ეროვნული ადმინისტრაცია ახორციელებს, ჩვენ ჩავატარეთ ტრენინგი კერძო სექტორის წარმომადგენლებისთვის. ამ ტრენინგისათვის მოწვეული გვყავდა მსოფლიო დონის ტრენერი, რომელსაც ძალიან დიდი გამოცდილება აქვს.“ განაცხადა ტურიზმის ეროვნული ადმინისტრაციის ხელმძღვანელმა მარიამ ქვრივიშვილმა.
