ფინანსთა მინისტრი ვანო მაჭავარიანი მზადაა ტელეკომპანიებს, რომლებსაც წლების განმავლობაში საგადასახადო დავალიანებები დაუგროვდათ, ვალების რესტრუქტურიზაციის სქემაზე შეუთანხმდეს.
მინისტრი ამბობს, რომ რამდენიმე ტელევიზიას საკმაოდ დიდი საგადასახადო დავალიანება აქვს. საუბარია ტელეკომპანიებზე: „იმედი“, „რუსთავი 2“ და „ მაესტრო“.
„მათ აქვთ ყველაზე მსხვილი დავალიანებები. „რუსთავი 2“-ის დავალიანება დაახლოებით 28 მლნ ლარის ფარგლებშია, „იმედის“ – 19 მლნ-ს ფარგლებში, ხოლო „მაესტროს“ – 8 მილიონზე მეტი“, – აღნიშნა მინისტრმა.
როგორც მაჭავარიანმა განაცხადა, ეს ბოლო რამდენიმე წლის განმავლობაში დაგროვილი საგადასახადო დავალიანებაა.
„ზოგადად, ისტორიას თუ გადავხედავთ, სხვადასხვა პერიოდში საქართველოში ეს მანკიერი პრაქტიკა, სამწუხაროდ, არსებობდა. ტელეკომპანიები იგროვებდნენ ვალებს, მერე ხდებოდა რაღაც ამნისტიის მსგავსი ჩამოწერა. ეს ხდებოდა სხვადასხვა ხელისუფლების დროს. ვფიქრობ, დადგა დრო, რომ აღნიშნული საკითხი ერთხელ და სამუდამოდ გასწორდეს და გეტყვით, რა არის ჩვენი ხედვა ამის მოგვარებისა და გასწორების“, – განაცხადა მინისტრმა.