მოსამართლის გადაწყვეტილებას სააპელაციო წესით გავასაჩივრებთ, არ გვაქვს მოლოდინი რომ შეიცვლება მოცემულობა, უბრალოდ გამოვიყენებთ ყველა სამართლებრივ საშუალებას, – ამის შესახებ ნიკა გვარამიას ადვოკატმა, დიმიტრი საძაგლიშვილმა ჟურნალისტებთან საუბრისას განაცხადა.
თბილისის საქალაქო სასამართლოში ადვოკატმა სასამართლოს განჩინება ჩაიბარა.
„ჩვენ გვაქვს 48-საათიანი ვადა გასაჩივრებისთვის თბილისის სააპელაციო სასამართლოში. გავასაჩივრებთ არა იმიტომ, რომ გვაქვს რაღაც მოლოდინი სააპელაციო სასამართლო შეცვლის ამ მოცემულობას, არამედ იმიტომ, რომ გამოვიყენოთ ყველა სამართლებრივი საშუალება. რაც შეეხება მომავალში ადამიანის უფლებათა ევროპულ სასამართლოსადმი მიმართვას, ბუნებრივია, ეს დამოკიდებულია ბევრ გარემოებაზე, მათ შორის, იმაზე, თუ რას გააკეთებს მომავალში პროკურატურა და როგორ მოიქცევა მოსამართლე“, – განაცხადა დიმიტრი საძაგლიშვილმა და აღნიშნა, რომ ნიკა გვარამია ყველა საპროცესო მოქმედებებში მიღებს მონაწილეობას.
ნიკა გვარამიას ადვოკატის თქმით, გვარამიას გაცნობიერებული აქვს რისკი, რომ შეიძლება გახდეს პატიმარი, მაგრამ ქვეყნის დატოვებას არ აპირებს.
„გვარამიას გაცნობიერებული აქვს ის რისკი, რომ შეიძლება გახდეს პატიმარი, უკანონო მაგრამ მაინც და ის თვლის, რომ არსად არ უნდა წავიდეს და ის აქ უნდა დარჩეს და გააგრძელოს ბრძოლა იმ ფორმით და იმ პირების წინააღმდეგ, რა ფორმითაც აკეთებდა ამას შვიდი წლის განმავლობაში“, – განაცხადა დიმიტრი საძაგლიშვილმა.
სასამართლომ "რუსთავი2"-ის ყოფილ გენერალურ დირექტორს 40-ათასლარიანი გირაო შეუფარდა და დამატებითი აკრძალვებიც დაუწესა. გვარამიას ქვეყნის დატოვება ეკრძალება. "რუსთავი2"-ის ყოფილი გენერალური დირექტორი ამბობს, რომ მის წინააღმდეგ წარმოებული საქმე აბსურდულია, სწორედ ამიტომ, გირაოს გადახდას არ აპირებს.
მოსამართლე გიორგი კერატიშვილის გადაწყვეტილებით, ნიკა გვარამიამ გირაო ერთი თვის ვადაში უნდა გადაიხადოს.
ნიკა გვარამიას ბრალი სისხლის სამართლის კოდექსის 220-ე მუხლით აქვს წაყენებული, რაც საწარმოს ხელმძღვანელობითი და წარმომადგენლობითი უფლებამოსილების გამოყენებას, ამ ორგანიზაციის კანონიერი ინტერესების საწინააღმდეგოდ მოქმედებას გულისხმობს, რამაც მნიშვნელოვანი ზიანი გამოიწვია.