აქცია "სირცხვილიას" თანაორგანიზატორი შოთა დიღმელაშვილი 20-21 ივნისს პარლამენტის შენობის წინ მიმდინარე აქციის დარბევის დროს დაზარალებულებს მიმართავს. დიღმელაშვილი მიმართვას სოციალურ ქსელ „ფეისბუქში“ ავრცელებს.
"ყოველდღე, "სირცხვილიას" დაწყებამდე, ბექა ბასილაია 5 საათიდან, პარლამენტის წინ გელით გავრილოვის ღამის დაზარალებულებს, ადვოკატების ჯგუფით. შედგება სარჩელები და თუ აუცილებელი იქნება, სტრასბურგამდე ჩავა. თქვენ იმსახურებთ კომპენსაციას“, - წერს დიღმელაშვილი.
საპროტესტო გამოსვლები და დარბევა თბილისში 2019 წლის 20 და 21 ივნისს, თბილისში მართლმადიდებლობის საპარლამენტთაშორისო ასამბლეის სესიის დროს რუსეთის დუმის დეპუტატის სერგეი გავრილოვის მიერ საქართველოს პარლამენტის თავმჯდომარისა და საქართველოს პარლამენტში რუსულ ენაზე ასამბლეის სესიის ჩატარებას მოჰყვა. თავდაპირველად საპროტესტო აქცია სასტუმრო „რადისონთან“ დაიწყო და შემდეგ პარლამენტის შენობის წინ გაგრძელდა. 20 ივნისს, გვიან ღამით სამართალდამცველებმა აქციის დაშლა დაიწყეს. აქციის დაშლის დროს კლინიკებში 240 მოქალაქე გადაიყვანეს, რომელთაგან 80 სამართალდამცველი იყო.
დაშავებულებიდან ორმა თვალი დაკარგა, მათ შორის 18 წლის გოგომ. დაზიანებები მიიღო 31-მა ჟურნალისტმა. საპროტესტო ტალღის შედეგად 21 ივნისს თანამდებობა დატოვა საქართველოს პარლამენტის თავმჯდომარემ ირაკლი კობახიძემ, ხოლო ასამბლეის საქართველოში ჩატარების ინიციატორმა, საქართველოს პარლამენტის დეპუტატმა ზაქარია ქუცნაშვილმა მანდატზე უარი თქვა.
აქცია მომდევნო დღეებშიც გაგრძელდა. თბილისის გარდა, საპროტესტო გამოსვლები დაიწყო ქუთაისში, ბათუმში, ფოთსა და სხვა ქალაქებში. აქცია დღესაც გრძელდება. მონაწილეების მოთხოვნაა შინაგან საქმეთა მინისტრის, გიორგი გახარიას გადადგომა.
ფოტო: Reuters
