ესპანეთის ეკონომიკის მინისტრი ნადია კალვინო შესაძლოა საერთაშორისო სავალუტო ფონდის მმართველ დირექტორად დაინიშნოს. ამის შესახებ ინფორმაციას ესპანური მედია ავრცელებს მთავრობაში მომუშავე წყაროზე დაყრდნობით.
ესპანეთის მთავრობის განცხადებით, სავალუტო ფონდის მმართველი დირექტორის თანამდებობაზე ერთ-ერთ კანდიდატურად ნადია კალვინოს განხილვა, ძალიან მნიშვნელოვანი და სასიხარულო ამბავია ესპანეთისთვის.
მანამდე საერთაშორისო სავალუტო ფონდის მმართველმა დირექტორმა ქრისტინ ლაგარდმა დაკავებული თანამდებობიდან გადადგომის შესახებ განაცხადა, რაც უკავშირდება მისი კანდიდატურის ევროპის ცენტრალური ბანკის პრეზიდენტის თანამდებობაზე წარდგენას.
ლაგარდის გადადგომის შესახებ გადაწყვეტილება ძალაში 12 სექტემბერს შევა.
ქრისტინ ლაგარდის ევროპის ცენტრალური ბანკის პრეზიდენტის თანამდებობაზე წარდგენის შესახებ გადაწყვეტილება 2 ივლისს, ბრიუსელში გამართულ ევროკავშირის სამიტზე მიიღეს.
50 წლის ნადია კალვინო ესპანეთის ეკონომიკის მინისტრად გასული წლის ზაფხულში დაინიშნა.