გერმანიის "ქრისტიან-დემოკრატიული" პარტიის თავმჯდომარე ანეგრეტ კრამპ-კარენბაუერი იქნება გერმანიის ახალი თავდაცვის მინისტრი, მას შემდეგ რაც ევროკომისიის არჩეული პრეზიდენტი ურსულა ფონ დერ ლაიენი ხვალ ოფიციალურად დატოვებს გერმანიის თავდაცვის სამინისტროს. ინფორმაციას Politico ავრცელებს.
ურსულა ფონ დერ ლაიენი, რომელიც 2013 წლიდან ედგა გერმანიის თავდაცვის უწყებას სათავეში, ცოტა ხნის წინ, ევროპარლამენტმა ევროკომისიის პრეზიდენტად აირჩია.
ანეგრეტ კრამპ-კარენბაუერი გასული წლის დეკემბერში აირჩიეს "ქრისტიანულ-დემოკრატიული" პარტიის თავმჯდომარედ მას შემდეგ, რაც გერმანიის კანცლერმა ანგელა მერკელმა განაცხადა, რომ იგი აღარ დააყენებდა საკუთარ კანდიდატურას პარტიის თავმჯდომარის არჩევნებში.
ანეგრეტ კრამპ-კარენბაუერი, ისევე როგორც ურსულა ფონ დერ ლაიენი, გერმანიის კანცლერის უახლოს მოკავშირედ და თანამოაზრედ მიიჩნევა.