ღონისძიება ვარიანში, იაკობ გოგებაშვილის სახლ-მუზეუმში, რომელსაც პრემიერ-მინისტრი ესწრებოდა, საპროტესტო აქციის ფონზე ჩატარდა.
აქციის მონაწილეები პრემიერს ტრანსფრანატებით დახვდნენ და 20 ივნისის ღამის გამო პროტესტს ახვეული თვალით გამოხატავდნენ. ისინი საქართველოს პრემიერს, შს მინისტრის დაუყოვნებლივ გადაყენებასა და ყველა იმ პირის დასჯას სთხოვენ, ვინც 20 ივნისის სისხლიან დარბევაში მონაწილეობა მიიღო.
აქციის მონაწილეები მამუკა ბახტაძეს მშიშარას და სამარცხვინოს უწოდებენ, რადგან მათი თქმით, პრემიერმა იაკობ გოგებაშვილის სახლ-მუზეუმთან შეკრებილ მოქალაქეებთან შეხვედრა ვერ გაბედა.
"ყოველთვის ღია ვარ ასეთი შეხვედრებისთვის,რაც შეეხება თქვენს მიერ დასმულ საკითხს, ერთმნიშვნელოვნად ნაციონალური მოძრაობას სურს, რომ საკითხი წარმოაჩინოს შემდეგნაირად, რომ პარლამენტის შტურმი არის პატრიოტიზმის გამოვლინება და კონსტიტუციის დაცვა კი არის ბოროტება.
ქართველმა ხალხმა დაინახა თავის ეკრანებზე თუ რასთან გვქონდა საქმე, და ბუნებრივია ამ ყველაფერს მიეცემა თავის სამართლებრივი შეფასებები.
გვაქვს საკითხი შემდეგ მოცემულობასთან მიმდინარეობდა პარლამენტის შტურმი და პოლიცია იძულებული იყო გამოეყენებინა ლეგიტიმური ძალა, ეს არის შეფასება 20 ივნისის მოვლენების.
გვყავს დაშავებულები და იყო შემთხვევები, როდესაც ზოგიერთმა სამართალდამცველმა გადააჭარბა უფლებამოსილებას, გამოიყენა ზედმეტი ძალა, ეს ყველაფერი უნდა დაადგინოს გამოძიებამ, რომ მოხდეს თითოეული ადამიანის იდენტიფიცირება.
ამ ყველაფერს მიეცემა სამართლებრივი შეფასებები, არავინ დარჩება დაუსჯელი, პროცესი,რომელიც მიმდინარეობს 21 ივნისიდან არის ამის მკაფიო დემონსტრირება, ისე როგორც ე.წ. ის პოლიტიკოსები, უპასუხისმგებლო ადამიანები, არ ასცდებიან პასუხისმგებლობას, რომ გამოიყენეს ჩვენი ახალგაზრდების გულწრფელი პროტესტი, თავის მიზნებისთვის.
სადმე არის კითხვის ნიშნები, რომ პოლიციამ გამოიყენა ლეგიტიმური ძალა? ეს არის მძიმე და ძალიან მტკივნეული საკითხი, სწორედ სოლიდარული ვარ ამ ნაწილში, აუცილებლად უნდა მივცეთ სამართლებრივი შეფასება, გამოძიება მიდის.
არავინ გეგმავდა სპეციალური საშუალებების გამოყენებას როდესაც პასიური კორდონი ვეღარ ახერხებდა აგრესიული ადამიანების აგრესიულად განწყობილი მომიტინგეების შეჩერებას, ისინი იძულებული იყვნენ გამოეყენებინა სპეციალური საშუალებები და ეს გადაწყვეტილება მიიღეს ადგილზე", - განაცხადა მამუკა ბახტაძემ მოგვიანებით ჟურნალისტებთან საუბრისას.