გარემოს დაცვისა და ბუნებრივი რესურსების მინისტრი გოგა ხაჩიძე რაჭაში, ონის რაიონის სოფელ ჭიორაში მინი ჰიდროელექტროსადგური გახსნა.
ღონისძიებას გაეროს განვითარების პროგრამის (UNDP) ხელმძღვანელის მოადგილე ინიტა პაულოვიჩაც დაესწრო.
"ეს პატარა ჰესი, რომელიც მთელ სოფელს მიაწვდის ელექტროენერგიას გარემოს დაცვის სამინისტროს და გაეროს განვითარების პროგრამის მჭიდრო თანამშრომლობით აშენდა და დღეს საზეიმოდ გაიხსნა. მოხარული ვარ, რომ ჩვენს პარტნიორებთან ერთად მრავალფეროვან პროექტებს ვახორციელებთ", - განაცხადა გოგა ხაჩიძემ.
ინიტა პაულოვიჩას განცხადებით, კი ძალიან მნიშვნელოვანი პროექტია, რომლითაც ადგილობრივი მოსახლეობა ჰესის მეირ წარმოებული ელექტროენერგიით უწყვეტად მომარაგდებიან და ფასიც შესაბამისად დაბალი იქნება.
ჰიდროელექტროსადგური წელიწადში 400 ათას კვტ.სთ. ელექტროენერგიას გამოიმუშავებს, რაც ჭიორას მოსახლეობის მუდმივ ენერგომომარაგებას მთელი წლის მანძილზე უზრუნველყოფს.
ჰესი გაეროს განვითარების პროგრამის - "მცირე ჰიდროენერგეტიკული რესურსების ათვისების ხელშეწყობა სასოფლო თემების დონეზე" - პროექტის ფარგლებში, ნორვეგიის მთავრობის დაფინანსებით აშენდა და ონის მუნიციპალიტეტს საჩუქრად გადაეცა.
პროექტი მიზნად ისახავს საქართველოში განახლებადი ენერგორესურსებისა და სუფთა ტექნოლოგიების განვითარებას. სამუშაოებზე დაახლოებით 100 ათასი დოლარი დაიხარჯა.