არავინ უარყოფს იმას, რომ საქართველოს ეკონომიკა, მისი ცალკეული დარგები და რეგიონები იმაზე მეტად არიან დამოკიდებული რუსულ ბაზარზე, ვიდრე ეს ქვეყნის ეკონომიკური უსაფრთხოების ზღვრულ ნიშნულს შეესაბამება, წერს ექსპერტი ეკონომიკის საკითხებში სოსო არჩვაზე Facebook-ის ოფიციალურ გვერდზე. ექსპერტის აზრით, ამ ურთიერთობების არევა და უფრო მეტიც, გაწყვეტა, საქართველოს მრავალმილიარდიან ზიანს მიაყენებს.
"ქვეყნის ჭეშმარიტი პატრიოტიზმი შრომაში, სწავლაში, პროფესიონალიზმში ვლინდება
ძველ ბერძენი ფილოსოფოსის, მწერალის, „მედიცინის მამა“ ჰიპოკრატეს ერთ-ერთი მთავარი პრინციპი, რითაც ის ახალგაზრდა ესკულაპებს მოძღვრავდა, იყო: „არ ავნო!“ - არ ავნო ავადმყოფის სხეულს, კიდევ უფრო არ დაუმძიმო მას ჯანმრთელობასთან დაკავშირებული პრობლემები.
ძველი ბერძენი ესკულაპის ეს შეგონება არანაკლებ აქტუალურია საჯარო სივრცეში მოქმედი ნებისმიერი პირისათვის, ვისაც თანამედროვე ინფორმაციის საშუალებებით ათასობით, ასეულ ათასობით ადამიანის სმენასა და გონებაზე შეუძლია საკუთარი აზრის მიწოდება და ზემოქმედება. მისმა ერთმა ნათქვამმა შეიძლება სერიოზულად დააზიანოს მრავალი ადამიანის ძალისხმევის შედეგი.
ის რაც ამ რამდენიმე დღის წინ ვიხილეთ „რუსთავი2“-ის ტელეეთერში, ეს ფაქტობრივად არის საქართველოს და ქართველი ხალხის წინააღმდეგ განხორციელებული დივერსია.
არავინ უარყოფს იმას, რომ საქართველოს ეკონომიკა, მისი ცალკეული დარგები და რეგიონები იმაზე მეტად არიან დამოკიდებული რუსულ ბაზარზე, ვიდრე ეს ქვეყნის ეკონომიკური უსაფრთხოების ზღვრულ ნიშნულს შეესაბამება. მაგრამ და სწორედ ამიტომაც არაა საჭირო ქვების სროლა იმ მიმართულებით, საიდანაც ზარბაზნის ლულები იმზირებიან. ამ უკანასკნელთაგან წამოსული საფრთხის აცილება სკაბრეზული გამონათქვამებით ნამდვილად არ მიიღწევა.
უნდა ყველამ გავაცნობიეროთ, რომ რუსეთი მოცემულობაა და მას ვერ „დავხურავთ“. მასთან ურთიერთობა და სიტუაციის დალაგება ინსტიტუციურად უფლებამოსილი მაღალინტელექტუალური, პროფესიონალი, პატრიოტი ადამიანების კოორდინირებული ძალისხმევის ფორმატში უნდა ვაწარმოოთ.
ასეთივე მოცემულობაა ამ ქვეყანასთან ეკონომიკური ურთიერთობები: რუსეთზე მოდის საქართველოს საგარეო სავაჭრო ბრუნვის მეექვსედი, უცხოელი ტურისტების მესამედი, საზღვარგარეთ რეალიზებული ღვინის ყოველი ხუთი ბოთლიდან - სამი და საქართველოში მოხმარებული ხორბლის ორი მესამედი. ფაქტობრივად, საქართველოს მრავალი ათასი ადამიანის, მევენახიდან და კირით-ხუროდან დაწყებული და ჰოსტელიერებით დამთავრებული, ეკონომიკური კეთილდღეობა ჯერჯერობით რუსულ ბაზარზე, რუსეთთან ეკონომიკურ ურთიერთობებზეა დამოკიდებული.
ამ ურთიერთობების არევა და უფრო მეტიც, გაწყვეტა, საქართველოს მრავალმილიარდიან ზიანს მიაყენებს. ქვეყნის არა მარტო ეკონომიკისა და მოსახლეობის კეთილდღეობის დონე რამდენიმე წლით უკან იქნებოდა გადასროლილი. ზრდის ნაცვლად მივიღებთ უკანდახევას, მოსახლეობის ტოტალურ გაღარიბებას (მარტო ფულადი გზავნილები რუსეთიდან საქართველოში დაახლოებით შვიდი ათასი შინამეურნეობის წლიური შემოსავლების ექვივალენტურია), ჰიპერინფლაციას, სერიოზულ დარტყმას სახელმწიფოებრივი მდგრადობასა და თავდაცვისუნარიანობაზე.
ამავე დროს, არ უნდა დაგვავიწყდეს რუსეთში მცხოვრები და დასაქმებული ჩვენი მრავალი ათასი თანამემამულე, რომელთა ბედზე, კეთილდღეობასა და უსაფრთხოებაზე პირდაპირ აისახება საქართველო-რუსეთის ურთიერთობების ტემპერატურა...
როგორც სულგანათლებულ რეზო თაბუკაშვილს აქვს ნათქვამი, პატრიოტიზმი არაა პროფესია, პროფესიონალიზმია პატრიოტიზმი. ჩვენ აქციები და მიტინგები არ უნდა ვაქციოთ არამატერიალური კულტურული მემკვიდრეობის ძეგლად. საქართველოს ხსნა შრომაზე, განათლებულობაზე, პროფესიონალიზმზე, ადამიანურ და ინსტიტუციურ ურთიერთობებში ეთიკაზე დაფუძნებულ პატრიოტიზმზე გადის", აცხადებს სოსო არჩვაძე.