ხელისუფლებას ჰგონია რომ "რუსთავი 2"-თან არის საომარ მოქმედებებში და არა რუსეთის ხელისუფლებასთან - ეს განცხადება "მედიის განვითარების ფონდის" აღმასრულებელმა დირექტორმა, თამარ კინწურაშილმა გადაცემა „პოსკრიპტუმის" ჟურნალისტის გიორგი გაბუნიას განცხადებაზე "ქართული ოცნების" მიერ გაკეთებული შეფასებების შემდეგ გააკეთა, რომლებიც გიორგი გაბუნიას მონოლოგს მყისიერად გამოეხმაურნენ.
კინწურაშვილი აცხადებს, რომ გიორგი გაბუნიას განცხადება არაეთიკური იყო და ამან ხელისუფლებას, რომელიც ყველა მნიშვნელოვან საკითხზე დუმს, საშუალება მისცა შეფასებები ეკეთებინა მთლიანი არხის წინაარმდეგ.
„მედია, რომელიც ანგარიშვალდებულია საზოგადოების წინაშე მეტი პასუხისმგებლობა მართებს. არამხოლოდ თავისი აუდიტორიის წინაშე, არამედ პროფესიის წინაშეც, ვინაიდან ეს შეიძლება გახდეს საბაბი ხელისუფლებისთვის, რომ გაამკაცროს კანონმდებლობა და ამის ნიშნები მყისიერად გამოჩნდა. ხელისუფლება, რომელიც არ ახდენს რეაგირებას ისეთ საკითხებზე, რომელიც უკავშირდება რეალურად ქვეყნის უსაფრთხოებას, იქნება ეს რუსეთიდან გაეკეთებული განცხადებები, თუ ადგილზე პატრიოტთა ალიანსის ანტისახელმწიფოებრივი განცხადებები, ისინიც დუმან, მაგრამ როდესაც ეს ეხება კრიტიკულ მედიას, თუნდაც მის არაეთიკურ ქმედებას, გაცილებით უკეთესია პროფესიის შიგნით მოხდეს შეფასებები და რეაგირება ამაზე ვიდრე მოხდეს ხელისუფლების ჩარევა და ეს გამოჩნდა კიდეც პირველივე წუთებში. ცხადია, ხშირად ხელისუფლებას ჰგონია რომ "რუსთავი 2"-თან არის საომარ მოქმედებებში და არა რუსეთის ხელისუფლებასთან. იმიტომ, რომ წაყრუების პოლიტიკა ერთი მხრივ რეალური საფრთხეების მიმართ და მეორე მხრივ რეაგირება ერთი ჟურნალისტის უგემოვნო გამოხატვაზე, არის კარგი ინდიკატორი თუ რასთან გვაქვს ჩვენ საქმე,"-განაცხადა თამარ კინწურაშვილმა.
