ე.წ. პრაიდის თარიღი განცხადებულია და ეს პრაიდი რა თქმა უნდა, არ შედგება. ხვალ დილას, ორშაბათს ყველნი ვიკრიბებით ვერის ბაღში, - განაცხადა ბიზნესმენმა ლევან ვასაძემ ვიდეომიმართვაში, რომელიც მას შემდეგ გაავრცელა, რაც ცნობილი გახდა, რომ „თბილისი პრაიდი“ ხვალ გაიმართება
„ზუსტი დრო და ადგილი ამ სიბილწის პროპაგანდისა, ამ ჩვენი უძველესი ტრადიციული ქრისტიანული კულტურის შეურაცხყოფის მცდელობისა, ჩვენ არ ვიცით, მაგრამ ჩვენ დილას შევიკრიბებით. რამოდენიმე ათასი ადამიანი. დაძრულია ჯგუფები ხევიდან, მთიულეთიდან, სვანეთიდან, დასაველთ და აღმოსავლეთ საქართველოდან, თბილისიდან და დაველოდებით ადგილსა და დროს“, - ამბობს ვასაძე ვიდეომიმართვაში და აღნიშნავს, რომ იქ იქნება პოლიციის კორდონი, მისი გარღვევა და უსირცხვილობის და გარყვნილების პროპაგანდისტების იქიდან გათრევა.
ვასაძემ მომხრეებს მიმართა, რომ ხელზე შეიბან თეთრი ცხვირსახოცები ან ზეწრის ნაჭრები, რათა ერთმანეთი ამოიცნონ.
„ასევე, ხელზევე შებმული ქამრები, რათა იქიდან შევძლოთ გავათრიოთ ჩვენი ქვეყნის შეურაცხმყოფელები“, თქვა ვასაძემ.
შეგახსენებთ, დღეს, თბილისი პრაიდის ორგანიზატორებმა განაცხადეს, რომ "ღირსების მარში", რომელიც ქვეყანაში განვითარებული მოვლენების გამო გადაიდო, ხვალ 8 ივლისს გაიმართება.
