რუსეთის პრეზიდენტმა ვლადიმერ პუტინმა, სანამ ოსაკაში, „დიდი ოცეულის“ სამიტზე გაემგზავრებოდა, Financial Times-ის ჟურნალისტებთან საუბრისას განაცხადა, რომ ლიბერალიზმის იდეა მოძველდა.
რუსეთის პრეზიდენტის განცხადებით, იდეოლოგიამ, რომელსაც ათწლეულებია დასავლური ქვეყნები ატარებენ, თავისი რესურსი დიდი ხანია ამოწურა.
მან ასევე კმაყოფილებით აღნიშნა და მიესალმა ამერიკასა და ევროპაში პოპულიზმის აღზევებას. პუტინის თქმით, იდეები, მულტიკულტურალიზმის მსგავსად, მტკიცე აღარ არის.
როგორც პუტინმა განაცხადა, ლიბერალიზმი მოსახლეობის დიდი უმრავლესობის ინტერესებთან წინააღმდეგობაში მოდის.
„ლიბერალიზმის მიხედვით, შესაძლებელია არაფერი არ გაკეთდეს. მაგალითად, მიგრანტებს შეუძლიათ მოკლან, დაანგრიონ, გააუპატიურონ და ეს ყველაფერი დაუსჯელი დარჩეს, რადგან მათი უფლებები დაცული უნდა იყოს“, - თქვა პუტინმა.
რუსეთის პრეზიდენტმა ისაუბრა ასევე ლგბტ თემთან დაკავშირებით და განაცხადა, რომ რუსეთში ლგბტ ადამიანებთან პრობლემები არ აქვთ, თუმცა ზოგიერი რამ გადაჭარბებულად მიაჩნიათ.
„დაე, ყველა იყოს ბედნიერი, ჩვენ არ გვაქვს პრობლემა ამასთან დაკავშირებით. თუმცა არ უნდა დავუშვათ, რომ ამან დაჩრდილოს კულტურა, ტრადიციები და ოჯახის ღირებულებები, რაც აქვს მილიონობით ადამიანს. ეს ადამიანები კი მოსახლეობის ბირთვს შეადგენენ“, - თქვა პუტინმა.
ლიბერალიზმის იდეების კრიტიკის გარდა, პუტინმა ისაუბრა აშშ-ის პრეზიდენტზე და შეაქო იგი. პუტინის თქმით, ტრამპი „ნიჭიერი პიროვნებაა“, რომელმაც იცის როგორი იურთიერთოს ამომრჩეველთან.
პუტინის მიერ ლიბერალიზმის დაგმობას, გამოეხმაურა ევროკავშირის ერთ-ერთი ლიდერი დონალდ ტუსკი, რომელმაც განაცხადა, რომ ის მკაცრად არ ეთანხმება რუსეთის პრეზიდენტის მოსაზრებას, თითქოს ლიბერალიზმი მოძველდა.
„ვინც აცხადებს, რომ ლიბერალური დემოკრატია მოძველებულა, ის ასევე ამბობს, რომ თავისუფლება, კანონის უზენაესობა და ადამიანის უფლებებიც მოძველებულია.
რაც ნამდვილად მოძველდა ეს არის ავტორიტარიზმი, პიროვნების კულტები და ოლიგარქიული წესები“, - დაწერა ტუსკმა მიკრობლოგ „ტვიტერზე“.
იაპონიაში, ოსაკაში დიდი ოცეულის (G20) სამიტი მიმდინარეობს. სამიტის ფარგლებში პუტინი დიდი ბრიტანეთის პრემიერ-მინისტრს ტერეზა მეის შეხვდება.
