ონის რაიონის სოფელ ჭიორაში 70 კვტ. სიმძლავრის მინიჰიდროელექტრო სადგური გაიხსნა. მის მიერ გამომუშავებული ელექტროენერგია წელიწადში 400 ათას კვტ.სთ შეადგენს, რაც ჭიორას მოსახლეობას მთელი წლის განმავლობაში მოამარაგებს.
ჭიორას ჰესის მშენებლობა ნორვეგიის მთავრობის დაფინანსებითა და გაეროს განვითარების პროგრამის უშუალო მონაწილეობით განხორციელდა. საპროექტო და სამშენებლო სამუშაოს ღირებულებამ 100 ათასი აშშ დოლარი შეადგინა.
ამავე პროექტის ფარგლებში იგეგმება 300 კვტ სიმძლავრის ხანი-2 ჰესის რეაბილიტაცია ბაღდათის რაიონის სოფელ ნერგეეთში და 500 კვტ სიმძლავრის ჰესის აშენება თელავის რაიონის სოფელ ფშაველში. 2011 წელს ორივე ჰესი ადგილობრივ მუნიციპალიტეტებს გადაეცემა.
მინიჰესების გახსნა UNDP-ის უფრო ფართო პროგრამის ნაწილს წარმოადგენს, რომელიც საქართველოში განახლებადი ენერგო რესურსებისა და სუფთა ენერგო ტექნოლოგიების განვითარებას ემსახურება.
გერმანიის განვითარების ბანკთან (Kფჭ) და გარემოსდაცვის გლობარულ ფონდთან (GEF) თანამშრომლობით UNP ხელს უწყობს მცირე ჰიდრო და გეოთერმული რესურსების, მზისა და ბიომასის ენერგიის ტექნოლოგიების (მზის თბური პანელები, ბიოგაზი, ენერგოეფექტური შეშის ღუმელები) გამოყენებას. მაღალმთიან რეგიონებში UNDP ახორციელებს სადემონსტრაციო პროექტებს, რომელთა მიზანია აჩვენოს ადგილობრივ მოსახლეობას სუფთა ენერგოტექნოლოგიების გამოყენების უპირატესობა და ადგილობრივი ინვესტორებიც დააინტერესოს.
