უკრაინის მართლმადიდებლური ეკლესიის საპატიო პატრიარქმა ფილარეტმა კიევში გამართულ სხდომაზე, სხვა სასულიერო მაღალიერარქებთან ერთად, კიევის საპატრიარქოს უკრაინის მართლმადიდებლური ეკლესიის აღდგენა გამოაცხადა. ინფორმაციას უკრაინული მედია ავრცელებს.
სხდომაზე მიღებული დოკუმენტის თანახმად, ფილარეტი და მისი მომხრეები არ აღიარებენ 2018 წლის დეკემბერში გამართულ უკრაინის მართლმადიდებლური ეკლესიების გამაერთიანებელ კრებას, სადაც მიღებულ იქნა გადაწყვეტილება უკრაინის გაერთიანებული მართლმადიდებლური ეკლესიის დაფუძნების შესახებ.
ფილარეტის მიერ დაფუძნებული ახალი ეკლესია ემიჯნება მსოფლიო საპატრიარქოს მიერ გაცემულ ტომოსს, რადგან იგი სრულ დამოუკიდებლობას არ აძლევს უკრაინის ეკლესიას.
თავის მხრივ, უკრაინის მართლმადიდებლურმა ეკლესიამ, რომელსაც მიტროპოლიტი ეპიფანე მწყემსმთავრობს, არ აღიარა პატრიარქ ფილარეტის მიერ მოწვეული კრება.
