უკრაინის ელჩმა ავლაბრის სასახლე, სადაც რუსი დეპუტატი სიტყვით გამოდიოდა, პროტესტის ნიშნად დატოვა. როგორც იგორ დოლგოვმა განაცხადა, მისთვის მიუღებელია ასამბლეაში რუს დეპუტატებთან ერთად მონაწილეობა.
დოლგოვმა ფორუმი დროებით დატოვა, მისთვის მიუღებელი სერგეი გავრილოვის გამოსვლა აღმოჩნდა.
"არ მინდა მოვუსმინო რუსეთის ფედერაციას, გავრილოვს. პარლამენტი თამაშობს ძალიან მნიშვნელოვან როლს დემოკრატიულ ქვეყნებში. დღეს წარმოდგენილია აქ პარლამენტარები, რომლებიც მხარს უჭერენ მართლმადიდებლურ პრინციპებს. მათ ეს ფორუმი აერთიანებთ, რაც ძალიან მნიშვნელოვანია როგორ ქართველებისთვის, ასევე უკრაინელებისთვის. ეს არის ფუნდამენტური ელემენტი ეროვნულობის. ეს ის პერიოდია, როცა უკრაინის ეკლესიამ მიიღო ავტოკეფალია. ჩვენ გვინდა ყველა მეზობელი, ყველა ქრისტიანი, ყველა მართლმადიდებელი. უნდა მივყვეთ ამ პრინციპებს -მშვიდობასა და თავისუფლებას",-აცხადებს უკრაინის ელჩი.
19 ივნისს თბილისში მართლმადიდებლობის საპარლამენტო ასამბლეის სხდომა გაიხსნა, რომელიც 23 ივნისის ჩათვლით გაგრძელდება და მას რუსეთის დუმის დეპუტატებიც დაესწრებიან. სხდომას ასევე ესწრებიან საქართველოს, მსოფლიოსა და რუსეთის საპატრიარქოს წარმომადგენლები.
რუსეთის ფედერაციის დელეგაციის შემადგენლობაში არიან სერგეი გავრილოვი, ივან სუხარევი, ალექსეი ჩეპა, ნიკოლაი ზემცოვი, ირინა კუზმინა, ალექსანდრ ფომენკო და ელენე კამინსკაია.
19 ივნისის ღონისძიებაზე პროგრამის მიხედვით კი სერგეი გავრილოვის მისასალმებელი სიტყვაა დაგეგმილი.
სერგეი გავრილოვი რუსეთის კომუნისტურ პარტიას წარმოადგენს. გავრილოვი აფხაზეთში იმყოფებოდა აფხაზეთის ომის მიმდინარეობის დროს და ომში საქართველოს წინააღმდეგ მონაწილეობდა.