მაკრონი ევროკომისიის პრეზიდენტის თანამდებობაზე მერკელის კანდიდატურას მხარს დაუჭერდა.
საფრანგეთს პრეზიდენტი ემანუელ მაკრონი ევროკომისიის პრეზიდენტის თანამდებობაზე გერმანიის კანცლერის ანგელა მერკელის კანდიდატურას მხარს დაუჭერდა. ამის შესახებ მან შვეიცარიულ ტელევიზიასთან ინტერვიუს დროს განაცხადა.
"ევროპას სჭირდება ძლიერი პიროვნებები, ადამიანები, რომლებიც მაღალი ნდობით სარგებლობენ და ამ პოზიციისთვის შესაფერისი უნარები გააჩნიათ", - თქვა მაკრონმა.
კონკრეტულად ანგელა მერკელის კანდიდატურასთან დაკავშირებით დასმულ შეკითხვაზე მაკრონმა თქვა, რომ თუ გერმანიის კანცლერი ისურვებს, გახდეს ევროკომისიის პრეზიდენტი, ის მხარს დაუჭერს.
"რა თქმა უნდა, მხარს დავუჭერ, იმიტომ რომ ჩვენ გვჭირდება ვინმე ძლიერი", - დასძინა მაკრონმა.
თავდაპირველად, მერკელის მიერ ევროკომისიის პრეზიდენტის თანამდებობის დაკავების სურვილი, ევროკომისიის ამჟამინდელმა პრეზიდენტმა ჟან-კლოდ იუნკერმა გააჟღერა.
"ანგელა მერკელის კვალიფიკაცია ევროკავშირის ნებისმიერი უმაღლესი თანამდებობისთვის იქნება ზედგამოჭრილი, როდესაც ის გერმანიის კანცლერის პოსტს დატოვებს", - განაცხადა ევროკომისიის პრეზიდენტმა ჟან-კლოდ იუნკერმა.
გერმანულენოვან გამოცემა "ფუკნესთან" ინტერვიუში, ჟან-კლოდ იუნკერმა, რომლის უფლებამოსილების ვადაც მიმდინარე წლის შემოდგომაზე იწურება, განაცხადა, რომ მას ვერ წარმოუდგენია ანგელა მერკელის პოლიტიკური არენიდან გაქრობა.
ანგელა მერკელი გერმანიის კანცლერის პოსტს 2021 წლამდე იკავებს. მან ოფიციალურად განაცხადა, რომ ამ ვადის ამოწურვის შემდეგ პოლიტიკური თანამდებობის დასაკავებლად არ იბრძოლებს.
ჟან-კლოდ იუნკერს ევროკომისიის პრეზიდენტის უფლებამოსილება 2019 წლის 31 ოქტომბერს ამოეწურება.
