"უძველესი აფხაზები" აფხაზეთის ტერიტორიაზე რომ ჯერ კიდევ 2 000 წლის წინ სახლობდნენ, ეს "კიდევ ერთხელ დაადასტურა" სეპარატისტულ აფხაზეთში ახლახან გაკეთებულმა "აღმოჩენამ". ამის შესახებ აფხაზური მედია იუწყება. არქეოლოგმა ზურაბ ხონძიამ გუდაუთის რაიონის სოფელ კულანირხუაში სამარხი აღმოაჩინა, რომლის ასაკი დაახლოებით 2 000 წელია.
აფხაზური მედიის ინფორმაციით, სამარხში ქალის ნარჩენებია აღმოჩენილი. მასთან ერთად სამარხში აღმოჩენილია ვერცხლის ფიბულა და ბიზანტიის იმპერატორ იუსტინიანე პირველის (483-565) დროის მონეტა.
"ყველა ეს აღმოჩენა არის ძალიან ფასეული როგორც ისტორიული, ისე მატერიალური თვალსაზრისით. ეს არის დასტური იმისა, რომ ძველი აფხაზების დასახლებები მაღალ სოციალურ-ეკონომიკურ დონეზე იმყოფებოდნენ. ჩვენი წინაპრები ეწეოდნენ მჭედლობას, კერამიკას და სხვა ხელობებს. ნაპოვნი არტეფაქტები ასევე მეტყველებენ აქტიურ გაცვლა-გამოცვლაზე, ვინაიდან სამარხებში ხშირად გვხვდება ე. წ. იმპორტირებული ნივთები", _ აცხადებს აფხაზეთის ე. წ. ისტორიულ-კულტურული მემკვიდრეობის სამმართველოს თავმჯდომარე დემურ ბჟანია.