საპარლამენტო ფრაქცია ნაციონალური მოძრაობის წევრმა, მამუკა ჩიქოვანმა პარლამენტის რეგლამენით მინიჭებული უფლებამოსილების ფარგლებში, სადეპუტატო შეკითხვით მიმართა ეროვნული ბანკის პრეზიდენტს, კობა გვენეტაძეს.
როგორც ტელეკომპანია „იმედის“ ყოფილი პროდიუსერის, მაია სტეფნაძის განცხადებით გახდა ცნობილი, ის სამსახურიდან გაათავისუფლა „იმედის” ერთ-ერთმა ხელმძღვანელმა გიორგი კალანდარიშვილმა, რომელიც ამასთანავე არის სს „ლიბერთი ბანკის“ გენერალური დირექტორი.
დეპუტატი მამუკა ჩიქოვანი ეროვნული ბანკისგან ითხოვდა განმარტებას, არის თუ არა აღნიშნული ფაქტი კომერციული ბანკების საქმინობის შესახებ კანონით განსაზღვრული შესაფერისობის კრიტერიუმებთან თავსებადი და სახეზეა თუ არა ინტერესთა კონფლიქტი.
საზოგადოებისთვის ცოტა ხნის წინ გახდა ცნობილი, რომ ტელეკომპანია „იმედის“ დირექტორმა გიორგი კალანდარიშვილმა თანამდებობა დატოვა. შესაბამისად, დეპუტატი ეროვნული ბანკისგან ითხოვდა პასუხს, ინტერესთა კონფლიქტის არსებობის შემთხვევაში რა სანქციები დაუწესდება „ლიბერთი ბანკს“ და მის გენერალურ დირექტორს.
სადეპუტატო შეკითხვაზე მიღებული ეროვნული ბანკის პრეზიდენტის, კობა გვენეტაძის პასუხის მიხედვით ირკვევა, რომ კომერციული ბანკის დირექტორი არ უნდა იყოს ამავე ბანკის სამეთვალყურეო საბჭოს ან აუდიტის კომიტეტის წევრი ან/და სხვა კომერციული ბანკის, არასაბანკო სადეპოზიტო დაწესებულების – საკრედიტო კავშირის ან/და სხვა საწარმოს ადმინისტრატორი.
ეროვნული ბანკი განმარტავს, რომ აღნიშნული შემთხვევა წარმოადგენს საზედამხედველო მსჯელობის საკითხს, რომელიც „საქართველოს ეროვნული ბანკის შესახებ“ საქართველოს ორგანული კანონისა და საქართველოს ეროვნული ბანკის საბჭოს დადგენილების გათვალისწინებით, განეკუთვნება კონფიდენციალურ ინფორმაციას.
ეროვნული ბანკი აცნობებს ფრაქცია ნაციონალური მოძრაობის წევრს, მამუკა ჩიქოვანს, რომ დეპუტატის მიერ წარმოდგენილი წერილის და მედიაში გავრცელებული ინფორმაციის საფუძველზე, საქართველოს ეროვნული ბანკი მოქმედებს თავისი კომპეტენციის ფარგლებში.