ეროვნულ-დემოკრატიული ინსტიტუტის (NDI) დაკვეთით ჩატარებულ კვლევაში ანაკლიის პორტის პროექტზეცაა საუბარი. NDI-ს კითხვაზე „გსმენიათ თუ არა ანაკლიის პორტის პროექტის შესახებ“, გამოკითხულთა 76%-ი პასუხობს, რომ „დიახ“, 21%-ი – „არა“. იმ 76%-იდან კი, ვისაც პროექტის შესახებ სმენია, 85%-ი მიიჩნევს, რომ ეს პროექტი საქართველოსთვის „იქნება სარგებლის მომტანი“, ხოლო მათგან 4%-ი პასუხობს, რომ „არ იქნება სარგებლის მომტანი“.
ამასთან, კვლევაში „თიბისი ბანკის“ დამფუძნებელების, მამუკა ხაზრაძისა და ბადრი ჯაფარიძის შესახებაც არის კითხვა დასმული – „ეროვნულმა ბანკმა „თიბისი ბანკის“ ორ ლიდერს მამუკა ხაზარაძეს და ბადრი ჯაფარიძეს გადადგომისკენ მოუწოდა 2008 წელს ფულის გათეთრების ბრალდებასთან დაკავშირებით. იცოდით თუ არა ამის შესახებ“. აღნიშნულ კითხვაზე 68%-ი პასუხობს, რომ „დიახ“, 27%-ი -„არა“. იმ 68%-დან, ვისაც სმენია „თიბისი ბანკის“ ლიდერების გადადგომის შესახებ 16%-ი მიიჩნევს, რომ ეროვნული ბანკის ეს გადაწყვეტილება იყო „უმეტესად დამოუკიდებელი გამოძიებით განპირობებული“, ხოლო 62%-ი ფიქრობს, რომ ეროვნული ბანკის ეს გადაწყვეტილება იყო „უმეტესად პოლიტიკური ინტერსებით განპირობებული“.