„თქვენ იმყოფებით სივრცეში, რომლის ფართობიც 4 000 კვ.მეტრია და რომელიც სრულიად უნიკალური, ულტრათანამედროვე ტექნოლოგიებითა და პროგრამებით არის უზრუნველყოფილი. თქვენ შეგიძლიათ შექმნათ ახალი ეპოქა და ნუ გაუშვებთ ამ შესაძლებლობას ხელიდან“, - ასე გააცნო საქართველოს ტექნიკური უნივერსიტეტის რექტორმა, აკადემიკოსმა არჩილ ფრანგიშვილმა მომავალ აბიტურიენტებს ის გარემო, სადაც STEM-აკადემიის საინფორმაციო შეხვედრა შედგა და ის შესაძლებლობები, რასაც STEM-სპეციალობები ითვალისწინებს.
საქართველოს ტექნიკურ უნივერსიტეტში, მომავალი აბიტურიენტებისთვის STEM-აკადემიის საინფორმაციო შეხვედრა ჟიული შარტავას სახელობის ინფორმატიკისა და მართვის სისტემების სასწავლო-სამეცნიერო და საექსპერტო უნიკალურ ლაბორატორიაში გაიმართა.
შეხვედრაში, რომელიც მეთერთმეტეკლასელებისთვის იყო გამიზნული, მონაწილეობა მიიღეს თბილისის სხვადასხვა სკოლის იმ მოსწავლეებმა, რომლებიც საქართველოში ამერიკული განათლების მიღებით არიან დაინტერესებულნი.
„ლაბორატორია გაძლევთ საშუალებას პირდაპირ ჩაერთოთ თუნდაც CERN-ში, სადაც თანამედროვე ფიზიკას სწავლობენ. ჩვენი სტუდენტები მონაწილეობენ იმ ექსპერიმენტებში, რომელიც CERN-ში მიმდინარეობს და ეს ონლაინ რეჟიმში ხდება. ჩათვალეთ, რომ თქვენ იმყოფებით შვეიცარიაში და ჩართული ხართ ამაჩქარებლებლის შექმნის უდიდეს ექსპერიმენტში“, - აღნიშნა არჩილ ფრანგიშვილმა.
ტექნიკური უნივერსიტეტის რექტორმა ახალგაზრდებს ბედნიერი თაობა უწოდა. მისი თქმით, ახალგაზრდებს შესაძლებლობა ეძლევათ, სწავლის პროცესში დროის ძირითადი ნაწილი უახლეს ლაბორატორიებში გაატარონ და სამეცნიერო კვლევებზე მეცნიერებთან ერთად იმუშაონ.
„ტექნიკურ უნივერსიტეტში გვაქვს საინჟინრო ფიზიკის ლაბორატორია, რომლის მსგავსიც ევროპაში არ არის, რაშიც ძალიან დაგვეხმარა მასაჩუსეტსის ტექნოლოგიური ინსტიტუტი, ტოკიოს უნივერსიტეტი. ჩვენ გვყავს მაღალკვალიფიციური პედაგოგები, რომელთა დამსახურებით ჩვენი არაერთმა მოსწავლემ სხვადასხვა კონკურსში გაიმარჯვა და ნასაში გაემგზავრა. ყველა მათგანმა გაიარა სკოლა, რომელსაც ჰქვია ტექნიკური უნივერსიტეტის საინჟინრო ფიზიკის სკოლა.
ტექნიკური უნივერსიტეტი ყველაფერს აკეთებს იმისთვის, რომ მიიღოს საერთაშორისო ამერიკული აკრედიტაცია, რაც ნიშნავს იმას, რომ თქვენ წინაშე ყველა კარი გაიღება და შეგეძლებათ კარგ სამსახურში დასაქმდეთ. თუ თქვენ ტექნიკურ უნივერსიტეტში სან დიეგოს უნივერსიტეტის საბაკალავრო პროგრამებზე გადაწყვეტთ სწავლას, მიიღებთ საერთაშორისო დიპლომს. სწორედ ამიტომ, მოგიწოდებთ, მოდით ჩვენთან, მიიღეთ განათლება და გააგრძელეთ მეცნიერებაში მოღვაწეობა. თქვენ შეგიძლიათ შექმნათ ახალი ეპოქა და ნუ გაუშვებთ ამ შესაძლებლობას ხელიდან“, - მიმართა სტუდენტებს არჩილ ფრანგიშვილმა.
STEM-აკადემიის საინფორმაციო შეხვედრაზე ახალგაზრდებმა ამომწურავი ინფორმაცია მიიღეს ტექნიკურ უნივერსიტეტში სან დიეგოს სახელმწიფო უნივერსიტეტის (SDSU) საბაკალავრო პროგრამებისა და საზღვარგარეთ სწავლის შესაძლებლობის შესახებ.
ყველა საბაკალავრო საგანმანათლებლო პროგრამა, რომლის შესახებაც ტექნიკური უნივერსიტეტის პროფესორ-მასწავლებლებმა მომავალ აბიტურიენტებს პრეზენტაციების სახით ინფორმაცია მიაწოდეს, უზრუნველყოფს სტუდენტების მომზადებას ტექნიკურ დარგებში წარმატებული პროფესიული კარიერისთვის. პროგრამებზე სწავლება ინგლისურ ენაზე წარიმართება, ლექციებს კი ამერიკელი და სან დიეგოს სახელმწიფო უნივერსიტეტის მიერ გადამზადებული ქართველი პროფესორ-მასწავლებლები ჩაატარებენ.
სამოქალაქო ინჟინერია სწრაფად მზარდი პროფესიაა, შესანიშნავი კარიერული შესაძლებლობებით. პროგრამა მრავალფეროვანი, საინტერესო და მოქნილია. ინჟინრის სამუშაო, უმთავრესად, ინტელექტუალური, ცვალებადი და ნაკლებად რუტინულია. პროგრამა ფოკუსირდება ზუსტ მეცნიერებაზე - მათემატიკაზე, ტექნოლოგიებზე და ინჟინერიაზე და მოიცავს სოციალურ და ჰუმანიტარულ მიმართულებებსაც, რადგან სამოქალაქო ინჟინერიის კურსდამთავრებულებმა უნდა შესძლონ თავიანთი გადაწყვეტილებების სოციალური და ეკონომიკური შედეგების გათვალისწინება.
კომპიუტერული ინჟინერიის საბაკალავრო პროგრამის დაუფლებით, ახალგაზრდები სხვადასხვა ტიპის ციფრული სისტემების შექმნასა და აწყობას შეძლებენ. პროგრამა მოიცავს ისეთი რთული სისტემების შესწავლას, რომელთა საშუალებითაც ხდება ფიზიკური სისტემებისა და გარემოთა სიმულაცია, ამინდის პროგნოზირება, ასევე მიკრო და ნანორეგულატორების მოხმარება ავტომობილებში, ტექნიკაში, კამერებში, რობოტებში, სამედიცინო ინსტრუმენტებსა და სხვა მოწყობილობებში. კომპიუტერული ინჟინერია მომავალ სპეციალისტებს საშუალებას მისცემს შეიმუშაონ ისეთი პროგრამები, რომლებიც კომპიუტერების მუშაობას გააკონტროლებს და სხვადასხვა ტიპის ინოვაციური ამოცანის შესრულების შესაძლებლობას მოგვცემს.
ელექტრული ინჟინერიის საბაკალავრო პროგრამა ძალზე აქტუალურია და საინჟინრო ინოვაციების სამ ძირითად მიმართულებას ეყრდნობა: ელექტროენერგიის გენერაცია და განაწილება; კომუნიკაციის მიზნით აუდიო/ვიდეო ინფორმაციის შესაბამისი სიგნალების მიღება, დამუშავება, გადაცემა; ელექტროენერგიის წარმოების ტექნოლოგიების, ელექტრომაგნიტური ფენომენისა და მასალების შესწავლა. ამ სფეროში საქმიანობა მოიცავს ისეთი მოწყობილობების, წრედების, ქსელებისა და სისტემების დაპროექტებას, ოპერირებას და სერვისს, რომლებიც გამოიმუშავებს ინახავს, გადაამუშავებს და აწვდის ელექტროენერგიას და ინფორმაციას.
პრეზენტაციების დასრულების შემდეგ შეხვედრის მონაწილე მოსწავლეები 4 გუნდად განაწილდნენ და STEM-თამაშებში ჩაერთნენ. თამაშები მრავალფეროვანი და სახალისო აღმოჩნდა, გამარჯვებულ გუნდს კი საჩუქრები გადაეცა.
STEM-აკადემიის საინფორმაციო შეხვედრის დასასრულ, ყველა მონაწილე ახალგაზრდას სამახსოვრო საჩუქრები და STEM-სერთიფიკატები გადაეცა.