ტელეკომპანიის წინააღმდეგ არის კერძო დავა, რომელიც წილებს უკავშირდება, - ამბობს პარლამენტის თავმჯდომარე ირაკლი კობახიძე „რუსთავი 2-ის“ საქმეზე.
მისი თქმით, სარჩელი პოლიტიკური დავისგან შორს არის და მედია საქართველოში თავისუფალია.
„ტელეკომპანიის წინააღმდეგ არის კერძო დავა, რომელიც წილებს უკავშირდება, როგორც ვიცი. დეტალური ინფორმაცია არც მაქვს. ეს დავა, ბუნებრივია, გადაწყდება ისე, როგორც ნებისმიერი კერძო დავა უნდა გადაწყდეს. ყაჩაღურად მიითვისა, თავის დროზე, „ნაციონალურმა მოძრაობამ,“ სააკაშვილმა, "რუსთავი2", ისე როგორც "იმედი," საზოგადოებრივი მაუწყებელი და ტელევიზიების ძალიან ფართო სპექტრი - ეს იყო ნათქვამი და ბუნებრივია ეს არის რეალობა, რომელსაც ყველამ უნდა გაუსწოროს თვალი. რაც შეეხება მედიის თავისუფლებას, მას არანაირი საფრთხე არ ემუქრება,“-ამბობს კობახიძე.
სამაუწყებლო კომპანიის 9%-ის მფლობელი ნინო ნიჟარაძე დაგროვილი გადასახადების სახით კომპენსაციას ითხოვს. საუბარია ჯამში, დაახლოებით, 26 მილიონ ლარზე. ნინო ნიჟარაძე არხის ყოფილი დირექტორის, გოგი გეგეშიძის, მეუღლეა და მისი გარდაცვალების შემდეგ მიიღო კომპანიის წილი. სამაუწყებლო კომპანია რუსთავი2-ის გენერალური დირექტორის, ნიკა გვარამიას, შეფასებით, ნიჟარაძის უკან ხელისუფლება დგას. მისი თქმით, ეს არის სარჩელი სარჩელისთვის და მორიგი შეტევა თავისუფალი სიტყვის წინააღმდეგ. გვარამიას განცხადებით, პროცესის მთავარი მიზანი რუსთავი2-ის სარედაქციო პოლიტიკის შეცვლაა.
