პანკისის ხეობაში ჩატარებული სპეცოპერაციის შედეგად მოკლული თემირლან მაჩალიკაშვილის მამა სახელმწიფო უსაფრთხოების სამსახურმა დაკითხვაზე დაიბარა.
მალხაზ მაჩალიკაშვილს უწყება პარლამენტის წინ მიუტანეს, სადაც ის ხორავას ქუჩაზე მოკლული დავით სარალიძის მამასთან - ზაზა სარალიძესთან ერთად, წელიწადზე მეტია, საპროტესტო აქციას მართავს.
მაჩალიკაშვილმა უწყება ჩაიბარა, თუმცა, მას ხელი არ მოუწერია. მისი თქმით, უცნობია, თუ რატომ იბარებენ დაკითხვაზე. მაჩალიკაშვილი სუს-ში 12 საათზე უნდა გამოცხადებულიყო, თუმცა ის არ მივიდა.
მაჩალიკაშვილი „რუსთავი 2“-თან აცხადებს, რომ მან უწყება ჩაიბარა, მაგრამ არ მივა.
„ეს სახელმწიფო უსაფრთხოების სამსახური არ არის, ეს ბარდაგია. მეხუთედ დამკითხეს 9-10 საათის განმავლობაში. ზუსტად მეხუთე დაკითხვის დროს მე განვაცხადე, საერთოდ ამის მერე არ გამოვცხადდები მოდულში იმიტომ, რომ იქ სხედან ჩემი მოსისხლე მტრები. არ ვაპირებ მანდ მისვლას. თუ აქვთ მაგის შნო და მაგის კაცობა, აგერ ვარ და ნებისმიერ დროს მოვიდნენ, ძალით წამიყვანონ,“ - განაცხადა მალხაზ მაჩალიკაშვილმა.