რა ფეტიშიზმია აქ გაბატონებული ევროპის მიმართ - ეს განცხადება, ადა მარშანიამ პარლამენტში გააკეთა. ადა მარშანიას აღშფოთება განათლების შესახებ კანონში შესატანმა ცვლილებებმაც გამოიწვია. მარშანია დეპუტატთა იმ ნაწილს მიეკუთვნება, რომლებიც განათლების შესახებ კანონიდან ტერმინის - "ლიბერალური დემოკრატიული ღირებულებები" ამოღებას ითხოვს.
„ახლა მე მივმართავ საქართველოს მოსახლეობას, ძალიან ცუდი რამ ხდება საქართველოს ე.წ. პარლამენტში დღეს. დღეს მართლა არ არის ეს საქართველოს პარლამენტი. კიდევ ერთხელ, მეათაეჯერ დავრწმუნდი ამაში, ახლა აქ ხდება მანიპულირება ტერმინოლოგიის, მანიპულირება ხდება ახლა და საშინელ ბავშვთა კოდექსს მიიღებს საქართველო ამ პარლამენტის წყალობით, სადაც თავდაყირაა ყველაფერი დაყენებული, სადაც ჩვენი იდენტობა, ჩვენი ეროვნული ფასეულობები, ჩვენი ისტორია, ჩვენი გმირების ფასდადებული ბრძოლა, ყველაფერი არის თავდაყირა დაყენებული და ბავშვების გადაგვარების გზაზე გინდა, თქვენ, რომ დააყენოთ ქვეყანა. არ გამოგივათ ეს.
„რა გჭირთ ხალხო, რა დაგემართათ, რა ფეტიშიზმია აქ გაბატონებული ევროპის მიმართ. ფეტიშიზმით უნდა ვიცხოვროთ და ვიმოღვაწეოთ ჩვენ თუ, საღი აზროვნებით და ჩვენი ეროვნული ტრადიციებიდან და ისტორიიდან გამომდინარე,“ - განაცხადა ადა მარშანიამ.
