პოლიტიკური გაერთიანება "გირჩი" ბიზნესმენისა და მსახიობის ლევან ჯიბღაშვილის საქმის დეტალების გასაჯაროებას მოითხოვენ. "გირჩის" ერთ-ერთი ლიდერი ზურაბ ჯაფარიძე ამბობს, რომ საინტერესოა, რატომ არ მოითხოვა საგამოძიებო უწყებამ მისთვის წინასწარი პატიმრობის შეფარდება, როცა სხვა მსგავს შემთხევებში, დაკავება მინიმუმ ორთვიანი წინასწარი პატიმრობით სრულდება.
"აქამდე არ ყოფილა არც ერთი პრეცენდენტი, როდესაც მსგავს საქმეზე შს სამინსიტროს დაემალოს, რა ნივთიერებაზე იყო საუბარი. კითხვებს აჩენს ის, რომ ეს ადამიანი გამოუშვეს გირაოთი, თან ძალიან პატარა გირაოთი. ხომ არ გვაქვს საქმე შერჩევით სამართალთან?! არ ვიცით, რა სუბსტანციაზეა საუბარი, მაგრამ ნებისმიერ სხვა ნარკოტიკზე, ძალიან პატარა დოზებზეც კი წინასწარ პატიმრობაში უშვებენ ორი თვით. კითხვის ნიშნებს ის აჩენს, რომ ცნობილი არის, ასე გავრცელდა ინფორმაცია, რომ დაკავების დროს, ეს ადამიანი, ვიღაც მაღალჩინოსან ითხოვდა, რომ იმას დაურეკეთო, როგორც ჩანს ჰყავს ვიღაცა მფარველი",-განაცხადა ზურაბ ჯაფარიძემ.
სასამართლომ მსახიობი და ბიზნესმენი ლევან ჯიბღაშვილი 10-ათასლარიანი გირაოს სანაცვლოდ 23 აპრილს გაათავისუფლა. ნარკოდანაშაულის ბრალდებით, ლევან ჯიბღაშვილი 22 აპრილს დააკავეს. გამოძიების ინფორმაციით, მსახიობის ავტომობილიდან ჩხრეკის შედეგად ნარკოტიკული საშუალებები ამოიღეს.
ჯიბღაშვილს ბრალად ედება სისხლის სამართლის კოდექსის 260-ე მუხლის პირველი და მე-3 ნაწილით გათვალისწინებული დანაშაულები. წარდგენილი ბრალი 5-დან 8 წლამდე თავისუფლების აღკვეთას ითვალისწინებს.