ეს და სხვადასხვაგვარი დამოკიდებულება ბადებს უსამართლობის განცდას და ეს ერთ-ერთი კრიტიკის საგანია, - ასე ეხმიანება პარლამენტის წევრი ეკა ბესელია მსახიობისა და ბიზნესმენის ლევან ჯიბღაშვილის საქმეს.
„ნარკოტიკული ნივთიერების რაოდენობა არის განმსაზღვრელი კვალიფიკაციის. ამის დაფარვა, უბრალოდ წარმოუდგენელია. ბრალის დოკუმენტშიც უნდა ეწეროს. ეს არის ერთ-ერთი მთავარი მაკვალიფიცირებელი გარემოება, რომლითაც უნდა შეფასდეს ქმედების შესაბამისი სამართლებრივი კვალიფიკაცია. სამართლიანობის მთავარი პრინციპი არის, რომ თანაბარი მოპყრობით უნდა ისარგებლოს ყველა პირმა კანონის თავსებადობის შემთხვევაში, როდესაც კანონის მიმართება ხდება მის ქმედებასთან. ეს და სხვადასხვაგვარი დამოკიდებულება ბადებს უსამართლობის განცდას და ეს ერთ-ერთი კრიტიკის საგანია“, - განაცხადა ეკა ბესელიამ.
სასამართლომ მსახიობი და ბიზნესმენი ლევან ჯიბღაშვილი 10-ათასლარიანი გირაოს სანაცვლოდ 23 აპრილს გაათავისუფლა. ნარკოდანაშაულის ბრალდებით, ლევან ჯიბღაშვილი 22 აპრილს დააკავეს. გამოძიების ინფორმაციით, მსახიობის ავტომობილიდან ჩხრეკის შედეგად ნარკოტიკული საშუალებები ამოიღეს. ჯიბღაშვილს ბრალად ედება სისხლის სამართლის კოდექსის 260-ე მუხლის პირველი და მე-3 ნაწილით გათვალისწინებული დანაშაულები. წარდგენილი ბრალი 5-დან 8 წლამდე თავისუფლების აღკვეთას ითვალისწინებს.